Nantra stórieta del Diversino - + 16 ani

sexta-feira, 24 de março de 2017

Nostro cusin Diversino, l`é un cristian co na granda cognossensa dea vita e co´l cour pien de bontà. L`é sempre un piasere scortàrlo parchè el ga sempre de fresche, de calde, de crude e de cote. Busie o verità chi che lo sà?

Domènega dadrio, intanto che se magnea na feta de formaio e se bevea un biciero de vin, el me ga dito co so vose de frate, che ani vanti ntel tempo dei nostri noni e bisnoni, í coloni í zera povereti, scarsi de robe e de mobília rento dea casa. Cosi nte le note de piú fredo, í bambini, í ndea dormire ntel leto del pupà e dea mama, insieme par scaldarse. Alora dopo quei se butea zo ntel leto, el pupà stea atento ai due picinini de due e tre ani de eta, par veder se í se indormensea profondamente, parvia che´l gávea so interesse. Í pensieri ghe vignea in testa, come el fià che se tira. Questi pensieri í lo fea ndar fora dea tramontana e anca Co´l so sángue de talian, no´l zera mea bon de governarse, de star fermo e assar so femena riposar in pace, povereta che la gávea laora tuto el giorno e la zera stanca, ma lu volea doperarla. Magari í zera due persone giovene, co´l sangue che bóiea stesso de un pignaton de brodo. Cosi soto el coertor dopo che í bambini se indormensea profondamente, í scomìnssiea í so afari, atenti, in silénsio e piampianeto par nó desminsiar í picinini.

Magari questo l`é un mistier che bisogna anca cognossensa par nó far bruta figura, parchè quando la animassion riva in testa, l`é impossìbele nó far gesti e movimenti par de quà, par de la, avanti e indrio. Cosi nó í ga gnanca visto quando í ga butà zo in tera el Tonin, che´l zera dea banda de fora del leto e povereto se ga spaurà e el ga scomínsia a piander a tuta vose. Dopo de questa confussion, í ga metesto depi de meza ora par el ritorno dea chietude, dea serenità e par í bambini indormensarse nantra olta.

Passada quela mesa oreta, el Joanin de tre ani, no´l zera mea bon de indormensarse, magari co í óci seradi el fea finta de dormire. Cosi quando el ga sentisto ancora movimenti, el ga desminssià che´l altro picinin e ghe ga dito:..-“Tonin fate furbo, adesso tégnete, par nó cascar nantra olta, parchè el pupà scominsìa ancora lú”.

Ademar Lizot

Nenhum comentário:

Postar um comentário

Gostou?Comente aqui e se possível inscreva-se.

Topo