Fredo ... fogon ... fameia - Fradèi Signorini

quarta-feira, 26 de abril de 2017

Noantri desendenti dea gran imigrassion véneta (taliana) ghemo na relassion granda col fredo. Sipia in véneto, Itàlia. Sipia tel sud´el Brasil.

In véneto, Itàlia, vanti de 1875, i nostri antenati sufria cola crise, la carestia le malatie e la splorassion económica. I gavea poc cosa magnar e la polenta zera el magnar che garantia la vita de tante fameie.

Tee èpoche de fredo, come i gavea sol strassoni i partia el fredo e, par nò crepar, i se reunia tee stale, insieme cole bèstie par scaldarse. Col caldo dele bèstie i se scaldea. Tanti i dormia tee stale par nò crepar de fredo.

El costume de far filò gà scomissià col reunirse tee stale par scaldarse. Le fameie darente se reunia par scaldarse cole bèstie e i proveitea par s-ciacolar. I omini parlea del laoro, dee crise, del governo e cosa far te quel´altro di. Le fémene le cosea, fea robe e parlea dea vita, dea fameia e dei laori domèstichi. I tatini (ciei, tosini) brinchea e giughea darente i pare e le mare. I giòvini, in scondion, scomissiea a morosar. La vita, tei di de fredo, girea in torno dae stala.

Dopo de 1875 tanti vèniti vien par el Brasil e de questi, tanti ndai a Rio Grande do Sul e Santa Catarina. Due posti che parea tanto so paese (region del véneto de ndove gai vegnesto) e, par quoela, posti de tanto fredo. El fredo ancora drioghe a lori.

In Brasil gai scomissià la vita in medo le scapoere sol cole man e due o trè feramente. Gai scomissià col fredo e drio partir el fredo. Mà come i zera gente de forsa, fede, coraio e speransa gai fato del fredo um alià, un motivo par unir la fameia e mantegner la léngoa e la tradission.

Tei di de fredo tanti visini se reuniva te na casa par far filò, parlar sora la rossa e trucar speriensie de vita. Rento casa e in torno el fogon lori bevea simaron, magnea mandolin, pipoche, pignoi, bevea vin o brodo. El fredo dasea le fameie darente e unide.

A mantina bonora tanti levea su e i tosi o anca i veci fea na foghera fora casa par scaldarse fin che vegnea fora el sol. Dele olte i visini reuniva darente questa foghera.

Le fameie, par no partir del fredo, se incantonea intorno el fogon. El pupà vanti la boca del fogon cuidea dea legna par nò morie el fogo. I fioi drio al fogon, sentai tee careghe o tea cassa dea legna, giughea, brinchea e dele olte fea dispeti e portea qualche sventola . La fémena catea un posto par far el magnar e tante olte brontolea parche i no a dasea far el magnar.

Quante olte se scaldea le robe dea rossa o da scola tel fogon e se ndea drio spussar fumassa. O el pupà, a matina bonora, scaldea i istivai par ndar su al monte butar magnar (cana) a le bèstie. Quante olte na bronsa saltea del fogon e sbusea le robe.

E cossita, el fredo fea la fameia, la reunia, la dasea darente, fea comugnon. El pupà ensegnea e esortea i fioi. El simaron girea de man in man e, ensieme col fogon e el fredo, fea la unión e la comugnon dea fameia.

El fredo fea tuti fermarse, incuciarse o sofrir. Mà el medesmo fredo, insieme col fogon, feà la unità dei visini e dea fameia. I valori, léngoa, costumi e modo d´esser véneto (talian) gà se mantegnesto e transmitio de gerassion a gerassion grassie tanto a la unità in torno del fogon e motivà pel fredo.

Polemo dir che incoi el fredo no ze sol fredo par noantri veniti (taliani). Ze de pi. Ze fameia reunida, ze la cuna (el berso) ndove ghemo impará la importansia dea fameia. Ze el scoltar i pi vecie. Ze ricordar i antenati. Ze mantegner vivi i nostri costumi, nostro modo d´esser ... nostri noni e nostri bisnoni. El fredo ... ze fameia!


Autori: Ivanir Signorini e Lairton Signorini

Nenhum comentário:

Postar um comentário

Gostou?Comente aqui e se possível inscreva-se.

Topo