Provìnsia de San Piero - Per Ademar Lizot

sábado, 22 de julho de 2017

La provìnsia de San Piero del Rio Grande del Sul, paese dei Gaùssi, “Maragati e Scimamghi” e anca dei “Lansieri Negri” í gladiadori del Riogrande, la “Sparta Brasiliana”. Provìnsia quel bravo Giuseppe Garibaldi ga fato la guera insieme dei Gaùssi e ga scrito el so nome ntea stória de questo paese, stòria de coraio e onore, Garibaldi gavea un sentimento profondo de afeto con questa provìnsia parvia che qua ga nassesto el so primo fiol Menotti Garibaldi ntel ano de 1840, ntea cità de Mostardas. Questa provìnsia, parona de na stòria de coraio e braura dea so gente, l`é el paese quel Signor ga destinà ai nostri antenati e a noantri par viver e compir nostro destin.

Mio nono Umberto Lizot ga vignesto compir so destin ntea Provìnsia de San Piero, ancora quando l`era picoleto e ga vivesto par 97 ani. Ntel ano de 1882 el ga arivà insieme dea mama e del pupà. Quando i ga disimbarcà del bastimento, so pupà Giosué ga alsa í òci al cielo e in preguiera el ga dito:..” San Piero, permesso de disimbarcare, so vignesto de lontan e mai piú vau veder el mio paese de nàssita, gnanca la mia gente carìssima. Dame coraio San Piero, dame forsa e speransa par infrontar la vita in questo paese che tu sei el paron”. San Piero in quel giorno, el zera qua zo e insieme a nostro bisnono parché lo ga ricevesto e tendesto so domanda e lo ga benedeto co so protession. Dopo questo paese ga recevesto nostra gente rento de so cour, come ga recevesto a Garibaldi tanti ani vanti. Zera i ani otanta del sècolo disnove e quelo sècolo qua ntea Provìnsia de SanPiero l`é stato un sècolo de guere e revolussione. Ntel ano de 1835 a 1845 la revolussion “Farroupilha”, diese ani de guera dei Gaussi-Riograndense che insieme de tanti Taliani, soto el comando de Giuseppe Garibaldi i gà infrontà el Império Brasilian nte na testemonianssa de sángue e onore. Ntei ani sessanta nantra disgràssia co la guera del Paraguai, che tanti persone de questa Provìnsia ga perso la vita in onore a la Pátria Brasiliana. Tutavia la piú terìbili e bruta revolussion ga scominsia ntel ano de 1893, quando mio nono gavea disdoto ani. La revolussion “federalista”, una guera intrà de fradei, piena de ràbia e brutalità. De una banda gavea la trupa dei “Maragati” de fassoleto rosso che zera anca bandiera, l`era na gente de coraio, sensa paura de gnente. Nte l` altra banda la trupa dei “Scimangui” de fassoleto bianco par bandiera e anca gente de coraio. Ntea cità de Passo Fundo, paeselo de “Pulador”, ntel giorno 27 de lùio de 1894, ga sucedesto la piú granda Batàlia dea revolussion quando piú de mila persone ga perso la vita in combatimento. Così tuti ani in questo giorno, í gaussi fa na insenassion dea Batàlia, co so cavai, so vestimenta. Fassoleti rossi e bianchi nantra olta in lota. Ani vanti quando zera picoleto, go cognossesto un “Gausso-maragato”, che in so gioventù gavea lota ntea batàlia del Pulador, soto el comando del general Gomercindo Saraiva, el capo dea guera. Quelo maragato l`era amico de mio pupà, el gavea nome Maurilio, ma noantri in rispeto lo ciamea de “Maragato”, l`era un gausso de simplissità e coraio, sempre de fassoleto rosso nel col e de onor che se anca el mondo vignea zo, nó se spaurea e gnanca perdea la serenità. In quei ani lera vècio co de piú de otanta ani, però co í sarvei pieni dei ricordi dea brutalità de quela guera e quando parlea de quelo giorno fea òci de tempesta e dopo con serenità e sapiensa de otanta ani de vita, el discorea che la guera l`é na stupidità dei omeni.

Grassie a Dio nostri antenati í zera gente de pace, religiosità e laoro, tutavia quei piú vèci in Itália i ga infrontà guere e tribulassion, così mai piú í volea saver de guere. El sentido dea so vita ntea Mérica zera la fameia, la religiosità e el laoro, così i ga alsa sú paese e cità, bele e esémpio par tuti, parvia che la mèio cosa dea vita l`é volerse ben e vìvere in pace.

Ademar R. Lizot





Nenhum comentário:

Postar um comentário

Gostou?Comente aqui e se possível inscreva-se.

Topo