Pagine

Clique no Player abaixo para parar a Rádio / Struca par fermar la ràdio

Clique para informações / Struca par informasion

sábado, 17 de outubro de 2020

Adio Noneto - Ademar Lizot

Ascolta la stòria:


 

 

             


                                                         Adio Noneto     

     Al dopo el mesdì de`n giorno caldo de veron go rivà al paesel dei noni e, dopo de caminar par una stradeta postata tra meso el pra e el vignal  go trovà el capitel consagrà a Santa Lucia,  alora go cava via el capel e co`l fassoleto go neta el sudor dela testa e dopo de moiar  i dei ntela aqua  Benedeta go fato el segno dela Santa Crose par dir una Avemaria a la Madonina e, cossì benedeto, sentindo el profumo dei boschi e repirando na arieta fresca, co pochi passi avanti  go visto la casa andove ga nassesto mia gente e, davanti dele so parede squasi sentenàrie gavea el nono;  el zera sentà nte`n bancheta de soto la ombria de`n piantona, de capeleto in testa, co`l vardar perso no so mia andove e, sicuramente no`l me ga visto parchè se anca el zera un vecioto conservà, che no`l mostrea mia i novanta ani de età, no`l vedea pi ben, gnanca darente, gnanca a lontan e, cossì  prostrà el zera la pròpia imàgine dela semplissità, e soratuto el representea tuta una època che stesso de lu no la esiste più, època dela amicissia, del volerse ben, de iutarse un con altro, època in che l`é persone no gavea mia na ambission fora de misura nel cuor e gnanca tanta perversità ntela ànima.  Quela imàgine go conservà par sempre ntele mie retine. 3 Quando go rivà pi darente par saludarlo el me ga varda sensa dir gnente e, come se no`l me cognossese, in silénsio el ga cava fora dela scarsela paia e un toc de fun de quei pròprio boni, un amareligno e par un tempo, e come sel fusse solche lu in questo mondo, el ga ciapà la brìtola e co la pacienssa de chi no ga pi dèbiti a pagar, el ga  taià el fun e parecia con caprìssio un vistoso sìgaro, de quei che bisogna de pi d`ora par finirlo fora e, solche dopo de molar par ària na fumana, el ga alsa su i òcii che de tanto s-ciari i parea due finestrine verte dela ànima e,  co la vose meso rauca, meso grave de una boca che ga mai mola fora una bestema, el me ga dito; ‘-Scampa via del sol, tirete qua visin a me,  fateme el piasere e sente-te!’

  ’-Come steo Noneto, tuto a posto?’  Go domandà.

  Alora come sel gavese scoltà na fròtola, ma de quele pròpio de rider, el ga mola fora na ridada e, nissun gavea na ridada forte e penetrante come la sua che fea i so mostàcii, gialdi de paia e tempo, deventar storsii e larghi.

   Dopo de quela ridada e sensa gnancauna preocupassion co la fumana che ghe ardea ntei òcii strachi,  el me ga dito:.. ‘- Bisogna che te sèpie che un criastian co la mia età no`l ga mia più gnente a posto, magari posso dirte che sto anca ben, se anca a le volte me par de caminar co l`anima su par l`spale, co`l sentimento de no saver pi far gnente in un mondo che sà tuto.’ 

   Quel fin de tardi insieme del nono l`é stà un dei più bei dela mia vita, par che me ga fato cossì ben, che fea fin pecà vegner via, però quando el suo vistoso sìgaro zera drio finirse e, el sol zera bel che a tramonto, l`éra anca e ntel momento dela partensa e, quando go dito ‘Adio Noneto’,   go visto che làgrime ghe moiea i mostàcii e la emossion ghe ingropea la gola che gnanca parlar no l`é sta pi bon, alora con teneressa lo go abràssia e nte`n Adio definitivo.

  Ademar lizot.



Nenhum comentário:

Postar um comentário

Gostou?Comente aqui e se possível inscreva-se.