Pagine

Clique no Player abaixo para parar a Rádio / Struca par fermar la ràdio

Clique para informações / Struca par informasion

sábado, 28 de novembro de 2020

La Bodega de Bepi Pasqual - Ademar Lizot

Ascolta la stòria spunciando soto:


 

 


                   Bepi  Pasqual e so Bodega - Per Ademar Lizot

  Nte quel tempo che  se percorea  distansie montà ntela schena del caval,  gavea la bodega de Bepi Pasqual. La zera postata de soto la ombria de una piantona, giusto in quel punto in che la stradeta la se stretea, squasi ntel pass del rieto,  ndove ani vanti i viachi de imboscada i ga copà Salvatore e so caval.  Alsada su de taule de angico par durar de pi de sento ani, la gavea diese brassi de longhessa par sete de profundità, cuerta de scandole e co`l soaio de tera. El balcon, anca quel fato de taule de angico taiade a colpi de manera,  el gavea par sora una balansa de due piati e par soto una s-ciopa de due cani e, se pol dir quel zera un vero confessionàrio ndove i sfortunadi,  tra meso na sboconada de caciassa e una fumarola de sìgaro paiero, i racontea i soi desgusti, magari  vignea fora anca fròtole, busie e bele ridade.

  La zera na bodega co le porte sempre verte, solche ciuse ntel giorno dei morti e ntel Vendre Santo e, ntele so scansie  tra meso  botìlie de caciassa e garafoni de vin,  gavea la inscrission:..”.No vendo mia fiado!” El vendea anca pignat e sialere  de fero, dolci, carameli e gasose par i bambini,  café, sùlchero e erba mate par l`é done, petròlio par el ciaret e àqua de creolina par i berni del cagnet e, par sassiar la fame dela clientela; bolasse, ovi coti al sal e sardele e anca el mèio merendin...pan, salame, formaio e vin.

    Però la stragranda magioransa dela clientela la zera constituída de bevidori de caciassa, che la zera lambicada par el pròpio paron dela bodega e, par tender i diversi gusti, el fea una con guaco e cresson un vero remèdio, altra con assinto par bever vanti del pranzo, bonìssima zera quela mescolada con miel silvestro un vero licor e dopo quela de spìrito rabioso, che la gavea conquistà la fama de cativa e la zera la predileta dei ciuchetoni che vanti de beverla i disea:.”.-Sta tento parchè sta caciassa qua el vècio Pasqual la ga lambicada co`l venen de na bissa coral rento.” Dopo  ntel momento de andar via i ghe metea de pi de`n ora par montar ntel caval.

  Dela  bodega de Bepi Pasqual  no go pi sentisto parlar, ma  qualche giorno, se una ànima bona la me impresta un bon caval, de quei che trota altiero, mastegando el freno co`i òcii spalancadi, alora go de andar nantra volta fin  nte quel punto in che la stradeta la se streta, squasi nel pass del rieto, andove i la ga alsada su de taule de angico par durar de pi de sento ani  e davanti dele so parede squasi sentenàrie, con rispeto  cavar el capel dela testa e dir una Ave Maria per l`anima del suo paron che`l savea lambicar una bonìssima caciassa e che  adesso  pol esser quel sia ntel purgatòrio drio servir quela rabiosa, predileta dei ciuchetoni, ma anca pol esser quel sia ntel Paradiso drio servir ai Santi quela soave, pastusiada con miel silvestro.

 

Ademar Lizot.

Nenhum comentário:

Postar um comentário

Gostou?Comente aqui e se possível inscreva-se.