Ascolta la stòria:
Una Giornada de Sol (per Ademar Lizot)
Transcorea nantro ano de Nostro Signor, quando dopo dele brine de lùio el agosto gavea scominsia ciaro e sereno, insieme de na arieta freda che vigneva dela banda nort e, co`l prìnsipiar del novo mese, ga spontà un giorno polito, che par arar i campi, el sol fea el invito. Alora el contadin svelto el ga saltà sù del leto. El so nome pol esser che sia Balduino, Faustino o Diversino, un giovenot de perfil Garibaldino.
Dopo del cafè, con pan, formaio e salan, co`l capelon de dressa in testa
e, due panòcie de milio in man, el ndea fin al potrerino ciamar, el ‘tobiano’ e el brasino’, una bela giunta de bovini, che i vignea
contenti, mostrando i denti e, intanto
quei magnea, la canga sú par el col el
ghe metea, due bèstie de forsa par tirar el arà e, insieme del omo che lo guida
con abilità, se stabilia una union fraterna, parchè intanto che un sentiva ntei bràssi el bruto sgorlon, quei
altri sentiva ntela schena la ruspeghessa del bruto teren.
‘-Avanti brasino, che de bambino te go comprà, quando
gnanca í corni te gavea spontà, forsa ntel peto che se finisse questo laoro
presto. Anca ti vècio tobiano, forsa ntele gambe e, stà tento sú par la riva,
che dopo ga solche la resteva par finirla. Avanti, avanti, cari amicii, che de qua un s-ciantin vien el Pierin, co la sapa e el
faldin e, insieme vien pupà co`l l`sgorbe
par portar casa el fen del prà, e, la par l`ùndese go speransa de rivar el pìcolo Gioanin
co`l seston del merendin, polenta, salan, formaio e vin.’
Cossì transcorea quela bela giornada de laoro e, quando el sol ntel orisonte caschea, a casa i ritornea, strachi,
pieni de tera, ma soratuto contenti parchè i suportea con stoissismo e alegria quel
bruto laoro e, anca i bovini, alora i gavea la so bonansa, àqua, milio e fen in
abondansa.
Dopo de
una stimanina, San Piero liberea na
santa piovesina e, la tera serenìssima parea fin una tosa belìssima, che pena
maridada guardea ntel ventre la semensa fecondada, alora se restea pieni de
contantessa, parché bela e dolse zera la vita quando nò se gavea mia paura del
laoro.
Ademar Lizot.
