El ritrato del nono - Causo de Ademar Lizzot

sexta-feira, 16 de dezembro de 2016

Gavea sìnque ani quando go cognossesto mio nono Júlio. Ricordo con emossion ntel cor, che zera un giorno che piovea e anca gavéa na ària freda. Mi insieme con la mama, dopo de due giorni de viàio gavemo arivà. Zera sabo, cuatro al dopo mezo di. Dopo sbassar dea lìnea tochea caminar par na stradeta postada tra mezo el vignal e el prà, dopo gavéa un bel giardino con fiori de colori e tante qualità. L`era ntel paese de Caibi SC.

Intanto se caminea par quela stradeta, la mama con so ombrelin e mi darente par via dea piova. In chel s-ciantin, gavemo visto un omo caminando, sensa umbrela, con na sapa ntea mano e la vestimenta bagnada dea piova, in testa so capel negro fisso che nianca l´ària cativa lo menea via. Quando gavemo arivà più darente de che´l omo soto piova, la mama ga ricognossesto Che l´era so pupà, mio nono Júlio, con so caminar sicuro, í mostaci longhi, so vardar de generosità e anca ntei òci portea insieme otanta ani de vita. Questo momento ze stato eternizà ntea mia memòria.

La mama ga mola via La umbrela par imbrassarlo, dopo lo go saludà e in quel àtimo go sentisto nte so man calegiade la forza e anca la stòria dea so vita, de laoro, deo cristian che gà trova ntel laoro e ntea faméia, el sentido dea vita. sempre con la forza dei brassi,”ribaltar mato con la manera, taiar piante co`l segoto de man e con la sapa ntea colonia fin che´l sole vien zo”. Man de um omo de coràio e onore, Che gà patìo tante dificoltà Che noantri no semo boni de maginarse.

Adesso passadi tuti questi ani, el ricordo che riposa dentro dea mia scatola dei ricordi, Le de un omo vècio ritornando casa del laoro, soto piova con na sapa ntea man e questa stampa la ze par sempre ntea mia testa e se gavese la arte dea pintura, la eternizaréa ntea tela.

Dopo tanti ani, go mai smentegà de che´l vècio, con i oci pieni de bontà, con na sapa ntea man, la vestimenta bagnàda dea piova e co`l capel negro fisso ntea testa con onore e dignità.



Ademar Rocco Lizot-

Nenhum comentário:

Postar um comentário

Gostou?Comente aqui e se possível inscreva-se.

Topo