La casa de Giuseppe Garibaldi - Per Ademar Lizot

segunda-feira, 3 de abril de 2017

Quando fà note e la piova vien piampianeto sú par `l scàndole, me vien quase na malinconia, magari l`é anca un s-ciantin de pace par ricordarse dei ani vanti o de pensarghesora la vita. Questa stimana ga piovesto vanti scurir alora ntea solitùdine del momento, go ricorda de quando gavéa diese o ùndese ani de eta, ntei ani sessanta del sècolo transcorso e che me piasea tanto ndar al sinema e sempre par veder í filme de “faroeste”. Una o due doménega al mese, questa zera la mia diverssion e dopo quando ritornea casa, me piasea contarghe al pupà la stória dea pelìcola.

Ricordo che nte na domenéga go visto un filme che´l me ga impressiona. L`era sora la guera dei mericani infrontando í selvìcola dea Mérica del Norte í “ pele-rosso”. Í soldati dei Stati- Uniti co so cavaleria, canoni e s-ciope e í selvìcoli co so cavai, so coraio, so ànima e so cour. Dopo quando go riva casa vanti scurir, go parla con gusto, dea stória dea pelìcola e dopo che go fini de contarla, mio pupà con so òci de amabilità me ga dito:..- Bisogna che te sèpie che quelo chei te fa veder ntel sinema, nó ze mai la verità, parchè i te fa veder quel che í vol Lori, í te fa creder che na granda veiacada, na carnifissina come í ga fato co í selvìcoli, la ze na roba de braura e coraio dei soldati mericani. Bravíssimi zera í selvìcoli dea Mèrica, gente de coraio, onore e dignità. Così bisogna farse furbo e nó imbroiarse con quei matussei, magari se te piase de stórie de coraio e braura, alora bisogna leder í libri dea stória dea vita del valoroso Giuseppe Garibaldi, questo si, compagno dei selvìcoli dea Mèrica, esémpio de coraio, onore e dignità.

Quele parole de mio pupà, go mai smentegà, e co la coriosità de tosatel, go lesto í libri dea stória de quelo bravo, cossi go intendesto cosa l`é onore e coraio. Dopo de esser cognossente dea stória dea so vita, me ga vignésto la curiossità de cognósser l`é cità chel ga vivesto ntel stato del Rio Grande del Sul e stato de Santa Catarina. Così a pochi mesi go ndato trovar la cità de Piratini RS, sèdia dea Repùblica Rio Grandense dei Farapi Gaussi, la ghenè ancora la casa che Giuseppe ga vivesto, go ndato rento dei comodi, co emossion ntel cour e go fato na orassion par l`anima de quelo valente. Dopo la cità de Laguna SC el paese de so caríssima e bela Anita, la dona dea so vita, persona de cour valente che gà infrontà la guera insieme a lu. La ghenè el museo co na colession de cose ciare o vece, sora Giuseppe e Anita, dopo ghenè anca la casa de Anita, ndove Garibaldi la ga cognossesto. Go ndato rento dei so comodi e in chel s-ciantin go ricordà le parole de Garibaldi, quando la ga incontrà..-“Tu devi essere mia.” Così parla un bravo quando el ga la fortuna de cognósser la fémena dea so vita.

La nostra cità de Passo Fundo, bisogna dirghe parvia che pochi lo sa, anca la ricévesto el paladino Talian. Ntel ano de 1839, durante la guera dei “Farapi”, Giuseppe e Anita Garibaldi, insieme co´l esèrsito dea Repùblica Rio Grandense, la trupa “Faropilha”, insieme del Gen. Bento Gonçalves e Gen David Canabarro, í ga fato acampàgio ndove adesso ze el setro dea cità, la piassa “Tamandare”, la ghenè un monumento in omenaio a quei bravi. Così sempre che arivo in quela piassa, cavo via el capel in rispeto a quela gente de onorabilità.

Ademar R. Lizot



Nenhum comentário:

Postar um comentário

Gostou?Comente aqui e se possível inscreva-se.

Topo