La careta vècia del pupà

sábado, 12 de janeiro de 2019

I tosatei dei di de incoi i sa mia cosa ze la felicità de giucar con la natura, con le cose sémplice e soratuto radicale che noantri feva quando bambini.
Incoi i tosati resta tuto el di con i telefonini in man rento casa sensa sentir el profumo dele piane e dele fiori, sensa sentir el vento batere ntel viso pentenando i cavei con el petenel dela natura, e pò, i sa mia cosa ze viver de verità.
Noantri quando picinini se fea un poco de tuto par giucar. Dale volte anca dispeto al pupà. Ricordo che i amici gavévano i careti fati de tole con rode de bore de piante. Noantri par far pi svelto, non gaver tanto laoro e par farse veder de pi che i altri gavemo fato nostro "careto" con la careta del pupà.
Si. Con la careta del pupà. gavemo cavà fora le tole de drio, davanti e dele due bande. Cavemo fora anca el tiron (cabeçalho) e i freni.
Con la "zora" noantri guidea (dirigia, e não no sentido de "eu acho") con i pie, urtando par la drita e par la sanca d'acordo con quel che se gavea bisogno.
Imaginarse 5 o 6 tosati su par la careta a 30, 40 chilometri par ora. Scominsiamo ndar nele rive piu piane e dopo anca in quele rive piu brute e piene de curve, roba da coparse.
Sempre costumo dir che i nostri àngeli i zera i piu svelti del cielo o furse anca gavévino arquanti de lori par badar tosati dispetosi come èrimo noantri.
La mama non parlava niente? Ma parché perder tempo.... La ga proa parlar arquante volte, ma fioi testoni come mi e me fradel Giovani... El pupà gnanca vedea parché se feva soratuto a le doméniche intanto lu ndea giugar la bòcie. E la careta romai la zera pensionata ntel paiol de milio e non se dopereva pi.
Ma son sicuro em dir che la me infànsia la ze stata tanto bela e divertente e se fusse possìbile tornaria adesso a èssere tosatel nantra volta. Parquela che me fa fin pecà vardar i tosati de incoi, soratuto quei dela cità.

Nenhum comentário:

Postar um comentário

Gostou?Comente aqui e se possível inscreva-se.

Topo