El ritorno del Programa Filò co'l Gìgio - Ademar Lizot

sexta-feira, 30 de outubro de 2020

Ascolta l'àudio strucando soto:

 

 

El ritorno del Programa Filò co'l Gìgio - Ademar Lizot

  


Ostrega che bela notìssia el ritorno a la radio Amici del Talian del programa Filo co`l Gigio, soto el comando del brau Ernane Fazolo, un giovenot che ga ntel timbro dela vose, vibrassione de pace e fraternità e, in quela ora che`l ze in ària le un momento de piaser in meso a tanti avilimenti e desgusti de questi bruti tempi e, anca soratuto el me fà ricordar de sti ani quando se fea filò ntela casa dei visini, quel tempo de semplissità in che le persone portea rento del peto el sentimento de iutarse un co`l altro e, in completa fradelansa i se catea par cantar cancione de speransa e otimismo, anca par racontar stòrie e fròtole, ma quele pròpio de rider  e, par magnar gavea sempre patate dolce, mandolini e gròstoli ornati co`l sulchero briliante. Andar far filò zera pròpio na alegria par tutiquanti, soratuto par i tosi che i spalanchea i òcii in serca de qualche tosa, par ciacolar co`l ogetivo de rangiarse la morosa e cossì che se ga alsa su tanti matrimònii.

  Quando ricordo de quel tempo indesmentegàbile non so mia bon de cavar fora le parole giuste par descriver la mia contantessa quando la  mama, con so vose carga de dolcessa la disea:..’-sabo de sera andemo far filò ntela casa del compare Diversino e dela comare Pierina, alora quando rivea el sabo, de matina bonora saltea su del leto co`l cuor che batea  inchieto parvia dela fadiga che zera spetar vegner sera e, un s-ciantin vanti del scurir me fea svelto par netarme e pareciarme polito par andar far filò.

    L`é pròpio un grando pecà che se ga squase fini questa tradission dei nostri antenati, parchè par disgràssia i costumi i ga cambia e par tante volte me vien la cativa impression che son drio caminar par una stradete longa de`n paese deserto e sensa cielo, andove el mondo ga cambia de posto co la tecnologia, la internet e el telefonin selular, che fà le persone caminar co la testa sbassada sensa rivar a parte nissuna e sensa saver che la felicità la ze postata ntele cose  sèmplisse dela vita, compagno andar far filò ntela casa del compare Diversino e dela comare Pierina, genitori dela bela Rosana, una tosa del mio gusto e, che me piasea tanto ben.

Ademar Lizot.


El Programa ritorna Luni giorno due de novembre (02-11-20)




Nenhum comentário:

Postar um comentário

Gostou?Comente aqui e se possível inscreva-se.

Topo