Pagine

Clique para entrar

RÁDIO AMICI DEL TALIAN NO AR

terça-feira, 14 de agosto de 2018

LA CAPA “IDEAL”- Roberto Arroque

“Te compro una capa Ideal, una scarpa e un stival...”

El antigo poemeto el parlava de la più famosa marca de cape che ghe zera ntel Rio Grande par protègierse dela piova, del fredo e del vento.

Fate de feltro par la fàbrica Renner, de Porto Alegre, in un modelo europèo del sècolo disnove, le cape “Ideal” le ga tegnesto caldi e sechi arconte generassion de gaùsci de tute le parte. Ntela region de colonisassion italiana le ga fato gran sussesso.

Le zera grande e folgade. Se ghen catava de trè o quatro sorte de colori, ma sempre scure. Ghen’era de cuele più sèmplisse e anca de quele carìssime coi botoni de metal indorà. Tanti modeli i vegneva con un capùcio, ma che sol i tosatèi i lo doperava. Parché i òmini i ghe piaseva combinarle con un capelon de feltro.

In Serafina, quel che gaveva la mèio capa el zera Berto Alban. Fin el di de ancoi ghe ze quei che i la comenta, de bela che la zera. Magari la capa de Berto la zera importada dela Spagna.

La capa Ideal la ze sorgista ntel prinsìpio del sècolo venti. Quà, le ga sostituìsto le antighe cape portade de Itàlia. E ancora ntela dècada del sessanta in tute le case qualchedun ghen’aveva una.

Ze stà in quel tempo che i nostri contadini i ga tacà motorisarse. Scomissiava la època de oro del “gipe”, Squasi sempre el primo auto che un colono el comprava. Ma vanti che i gipeti i conquistasse le nostre strade, el domìnio el zera dele carete e dei cavai. E i giorni de fredo o de piova i gaveva la capa Ideal come parte dela paisage.

A la doménega de matina i òmini e i tosi de colònia i se partiva a caval e, par strada, ndea catando su compagneri. Drio man che i se prossimava del paese, el grupo el vegneva più grando. Quando che i rivava, dele volte romai i formava turme de vinti o trenta cavaleri.

Me ricordo che, a star a la finestra, vedeva passar arcoanti de quei grupi a la doménega de matina. Se la zera una giornada freda i passava tuti quanti ingrugnadi soto la so capa Ideal. E quando che pioveva se vedeva el cavalero col capel de feltro de abe sbassade e con la capa Ideal de gola alsada --e granda bastansa par querzer el omo e anca quasi tuto el caval. De la bèstia restava fora sol la testa e le gambe. Caval e cavalero, ben tegnesti de la piova e del fredo e con un trabuco picà de una banda anca se no ghe zera più animai pericolosi i fea i so viàgii sensa paùra.

Ma ghen’era de quei che noi ghe piaseva mia protegierse pròpio del tuto. Me ricordo che Arnaldo Montanari, al tempo de tosatel, pena che'l zera fora de la vista de so mare el se cavava i stivai e, anca se zera fredo, el ndava via coi pié sfondadi n'te l’àqua de la sargieta. E ancora el spralongava el so tragieto fin scola de più che'l podeva sol par sentirghe el gusto fredo del móio ntei pié intanto che la capa Ideal e el capùcio i ghe scaldava el resto del corpo.

Drio man che tuti i ga tacà ndar via de gipe e, dopo, de altri auti le cape le ze state meteste in te un canton. E le tarme quei bisseti che ghe piase magnar roba le ga fato la so festa. Pochi i ga ancora la so capa metesta via intiera.

E i cavaleri quei che, quando che i passava soto la piova, se ghe vedeva sol un tocheto de fàcia in tra meso el capel e la capa romai i ze tanti ani che i se mostra, ancora con la so pose orgoliosa, sol in tei vècii ritrati.

Ma far anca che... El mondo ghe vol che'l vaghe sempre avanti. Toca capir che, al di de ancoi, in te una giornada de inverno nissuni più trucaria el viagiar dentro de un auto caldo par un spassegiar a caval soto la piova par più bela e bona che la sia una grande capa Ideal querzendo tuto el corpo del cavalier...











Nenhum comentário:

Postar um comentário

Gostou?Comente aqui e se possível inscreva-se.