Familia Lizot: De Cesiomaggiore-IT al Brasil

domingo, 28 de maio de 2017

Questa ze la stória de Giosué Lizot, mio bisnono, che ntel ano de 1882, ga rivà al Rio Grande del Sul, con la sposa e tre fioi.

El ga nassesto ntel ano de 1848, ntel paese de Can de Cesiomaggiore, Santa-Giustina, Provinsia de Belluno Itália. L`era fiol de Eustachio Lizot e Teresa e gavea tre sorele, Anna, Maria Madallena e Maria Luisa. Ntel ano de 1874 se ga maridà con Domenica Debastiani e ntel giorno 24 de agosto de l876, ga nassesto el primo bambin, mio nono Umberto.

Ntel ano de 1882, quando mio nono Umberto gavea sei ani, Giosué Lizot gavea la resolussion de andar via a l`Mérica, volea andar al Canadá, co so sposa e fioi Umberto (sei ani), Amadeo (quatro ani) e Rosa (un ano).

Alora so pupà, ga fato la partìlia con so sorele e la so parte el ga pagà el viàio de bastimento e i ga imbarcà insieme dei altri migranti ntel porto de Genôva. Dopo quando í zera in viàio, í ga savesto la novità dei organisatori  che nó gavea piú tere disponìbele ntea Mérica del norte e quel so destin adesso, zera la Mérica del Sul, paese denominà Brasil, che nó i gavea mai sentisto parlar.

Dopo del viàio pien de tribulassion, í ga rivà ntela cità de Porto-Alegre, provìnsia de San Piero del Rio Grande del Sul. Dopo dea quarentena, a caval e careta í ga percoresto cento km co'l destin al “Campo dos Bugres”, che adesso ze la cità de Caxias do Sul e dopo nantro giorno de viàio í ga rivà a la colònia de so destin, í meso al mato, su par í monti, par via che le tere mèio de piantassion, le zera ocupà par í tedeschi, che ze rivadi prima. Quando í riva al so destin, í ga nominà el paeselo de San Giàcomo e adesso í zera signori de un tochetin de tera ntel posto norte dea colònia, magari ancora pien de bèstie de ferossità.

Ntei primi tempi, el ritorno a l`Itália ghe vignea sempre in mente, magari questo adesso zera impraticàbile parvia del ricorso scarso. Così Giosué ga laorà par far na abitassion par so faméia. El se ga incoraià parché el clima l`era bonìssimo e mèio de tuto gavea abastansa de sassi e nostro bisnono gavea la regalia dei oriùndi de Cesiomaggiori, de saver laorar coi sassi, così presto el ga alsà sú na moratura confortàbili par so faméia.

Dopo de pochi mesi quela colònia l`era più bela e anca lìbera dele bèstie cativi. Così passadi due o tre ani, Giosué che gavea perso so sposa Domenica, se ga maridà nantra volta, adesso co Antonia Venzon e ga visto so faméia prosperare.

Adesso dopo de tanti ani, í sassi fa el testimònio, querti de piante in quela colònia, del laoro de Giosué Lizot, parché le ze ancora alsade su le parede dea so casa de tanti ani vanti.

Escrita por Ademar R. Lizot
Envie sua história para o Site Brasil Talian como faz o Ademar e outros escritores, clique aqui para entrar em contato

Nenhum comentário:

Postar um comentário

Gostou?Comente aqui e se possível inscreva-se.

Topo