I nipoti dea nona Doménica Maria Antònia Dal Castel, nona Antonieta, i ricorda che sempre la contea quel che ghe ze sucedesto là par el 1915, fra la guera. Le trupe militari, dove le passea, le catea su tuto quel che i volea, nò solo formàio, salame, fasoi, riso, ma anca cavai e musse. I copava vache, piégore, càvare, porchi, galine... par farse da magnar. Zera na stràgine pròpio. La nona Antonieta, savendo de tanti malani che i fea in tute le parte, la se ga racomandà a Dio, parché altro no la podea far, che pregar, e basta. E le trupe le ze rivade casa sua, là del nono Francesco Nesello, el so sposo, e i ga tacà ciapar tuto quel che i volea. La nona la se ga pensa:
– Maria Santa, se i me porta via la mussa, come fao ndar messa, e ndar far le spese. Dio bono, giuteme, faghe al manco che la musseta la reste rota par un per de di, rota provisòria, al manco no i me la portarà via!
La ga gnanca finio de pregar, che i soldai i ghe dise:
– Desso ndemo ciapar la vostra mussa, che la gavemo vista lì in stala. E la nona la ghe dise, no tanto sicura, par veder se no i ndea tea stala:
- No stè gnanca ndar véderla, parché la ze rota, e no la ve giova par gnente.
Ma lori no i se ga convinti e i ze ndai veder. Eco la sorpresa, no ze che la mula la se impaca, no la volea móverse. Ma, dopo tanto insister, osarghe, sponciarla, la scomìnsia ndar, ma la caminea tuta storta. Lora i soldai ga credesto quel che a nona ghe gavea dito e i la ga dassada lì.
Eco, quel che podaria esser na disgràssia, ze stà na gràssia de Dio, che’l ga fato restar rota provisòria la mussa dea nona Antonieta.
Dopo ndai via i soldai, la mussa la ga tacà ndar drita ancora e, a la doménega, la nona ze ndata a messa par ringrassiar el Signore de ver ancora la so musseta.
Testo: Moacir S Dal Castel
Testo: Moacir S Dal Castel
Traduzione: Frate Rovilio Costa
Correio Riograndense-(12-7-2002)
(Vita Stòria e Frottole)
Nenhum comentário:
Postar um comentário
Gostou?Comente aqui e se possível inscreva-se.