Balete de sùchero - Roberto Arroque

segunda-feira, 2 de julho de 2018

I tosatei golosi de ancoi i gà in mente i gelati (sorvetes), le cicolate, i bomboni. Ma, ani
indrio, i sognava con cose tanto più umili. Come le balete de sùchero...
I sachi e le late che scondeva dentro sto farinoso dolso li zera vardadi con la gossa
in boca. Parché tuti i saveva che dentro l’era pien de gnocheti dure parvia che la tènica
de cuei tempi là no la permitiva mia un refino completo, e el sùchero bianco el vegneva tuto
pien de sti gnocheti. E si, dure. Ma anca gran delissiose! Quele le zera le famose “balete
de sùchero”.

L’era tanto apressià anca el sùchero rosso, el “mascavo”, ancora più selvàdego del
ponto de vista industrial, ma con balete de un saor che, par i tosati, el zera iresistìbile!
Nei ùltimi ani de la dècada del Milanovessentoevinti ze stata inagurada la prima
torefassion de cafè de Serafina Correa, de la firma “Chaves & Amp; Sampietro”.
El sùchero rosso el figurava ntela fòrmula del produto de la nova empresa
serafinense. E el posto de méterlo via el zera un galponeto de tole che ghe zera dedrio del
prèdio prinsipal de la torefadora.

Fra i tosatei che pensava in una maniera de ndar rento de sto galponeto, e
sgionfarse con cuela dolse tentassion, ghe zera cìnque che i zera sempre gran atenti a tuti i
movimenti de cuei che laorava in te la fabricheta. Sti cìnque tosati i zera Berto Campetti,
Arcìlio Variani, Ricardo Pasqualotto, Guerino Massolini e me pare, João Arroque Filho.
Un giorno, vardando un laorante verzer la porta, i gà visto che'l galpon nol gaveva
mia soàlio, solche un piso de tera.
De note con la tènica imparada dei conìcii, i gà cavà un buso che'l passava par
soto la parede. E i ze ndati entro. Là i se ga visti in paradiso: sùchero rosso in quantità, con
balete ai fùlmine. E, el mèio de tuto: nissuni par dir de non magnàrghene!

Dopo de sgionfi i ze ndati fora pal stesso posto. Ma, vanti, i ga coerto el buso con
tera, par scònderlo.

Par arcoante note el galponeto el ga bio vìsite. Ma i cìnque ragasseti i ga cometesto
el sbàlio de contarghe ai altri tosatei. E, entro in poco, ghe zera due dósine de pìcoli
angeleti de pansa sensa fondo e sempre pi disposti de sgionfarse de sùchero rosso e con
tuti i costi paghi par la firma Chaves & Amp; Sampietro...

Una serta note, intanto che i cìnque compagni i magnava sùchero, ghe ze saltà
fora, vegnesti de drio de un mùcio de sachi, due òmini: i paroni in persona!

“- Semo persi!”. Gà sbalbotà uno dei tosati, lu pien de paura e la boca piena de
sùchero.
Ma la paura la ze stata par poco tempo. Par la sorpresa de lori, i paroni i gà fato una
proposta ai tosatèi:

“- Se ne imprometé de non tornar più qua, par ancoi ve assemo magnarghene fin
che volé!”
Proposta che, naturalmente, i la ga acietada sensa discussion!

Là de un toco, sgionfi de balete de sùchero e ringrassiando la considerassion ghe i
gaveva bio de parte dei paroni, i tosatei i ze ndati via disposti a cumprir l'acordo.
E, parquel che se sa, lo gà cumpristo del bon. El cumprimento del'acordo, magari,
el ze sta gran fassilità pal fato de che, poco tempo dopo, la ‘Torrefassion de Cafè Chaves &
Sampietro’ la ga serà definitivamente le porte. I dize che l’é sta parché i ga tratà i so debitori con la medésima considerassion che i ga bio con i tosati magnoni de
sùchero...

Por: Roberto Arroque
Redação: Jaciano Eccher (#jacianolocutor)

Nenhum comentário:

Postar um comentário

Gostou?Comente aqui e se possível inscreva-se.

Topo