La pestada del Orco - Roberto Arroque

quarta-feira, 3 de abril de 2019

“Chi mete el piè in te una pestada del Orco perde el rumo.”
Cosi i dizeva i nostri vècii al tempo che tuti i credeva nel Orco, un personage
mitològico de la cultura taliana, squàsi tipo un diaolo. Sto ente el se divertiva a caminar in
volta de par tuto sol par ver el gusto de far perder-se quei pori can che ghe tocava ndar par
andove chel zera passà lu. I diseva che tante volte el Orco, che'l zera gran grando, con
arcoanti metri de altessa, el se meteva in sima un passàgio con un piè par ogni banda de la
strada. E quei che ghe passava soto, sia a piè o sia a caval, dopo i se perdeva.
E Orco el zera anca bon de deventar pìcolo e meterse in fondo le fontane e i possi
sol par quei che ndava tor àqua véderlo là soto e spaventarse. Mal lu ghe piaseva più
ancora ndar caminando involta co'i so savatoni par assar de par tuto le so peste invisìbile.
Luiz De Cesaro, el “Gigion”, un dei meio cantori che Serafina gà cognossesto, el
confirmava con fati presensiadi pròpio par lu.
- Una volta, quando mi zera tosatel. Racontava Gigion. Me fradel el se gà
perso ben darente casa nostra, passando in meso un poche de piantele che lu el ghe saveva
fin el nome una a una... El ze ndato impegnarse in te un spinèr che ghe zera là. El gà osà
par aiùto, me pare el ze ndà acudirlo, e quando domanda par cosa che'l se gaveva metesto
par so voia in meso a i spini, el gà dito chel se gaveva perso. Ghe pareva de esser in te un
sarandì banda el rio Carero, e el gaveva paùra de vegner fora de là e negarse. Varda ti... El
rio el zera arcoanti chilòmetri de là. L’è stà una vita tirarlo fora de in meso el spiner.
Seguro che'l gaveva pestà ntela peca del Orco...
“Tanti ani dopo” –continuava la stòria Gigion—“quando mi romai gaveva fioi
grandi, una sera me visin el gà perso el rumo al passar a caval devanti casa mia andove
che'l gaveva passà cento mila volte. El ze ndà fermarse dentro de la me piantassion...
“El gà percoresto tute le carere de mìlio che ghe zera piantade noantri. Magari,
gavemo savesto sol al giorno drio, vardando le pestade del caval. El feniva una carera, el
fea la volta e el ndea rento par quel’altra, sensa mai rabaltar una gamba del mìlio alto.
Tuta la note, l’è stato là...
Quando che'l gà fenìo quel tragieto, l’è ndà fora dela rossa drito su par un baranco, ndove che'l se gà rabaltà e perso una sinela. Romai zera matina, co'l sol alto. Lora che’l gà recognossesto andove che'l zera. E el gà ciapà un scurton par ndar casa sua sconderse de la vergogna...

“Mi e i me fioi gavemo catà la sinela, gavemo recognossesto che la zera la sua, e
semo ndati portàrghela. Lora el visin el me gà contà come che lu la gaveva persa: el se
gaveva visto n'te una strada strània. E dopo, in meso el miliaral più grando dela so vita,
che'l ghe gà metesto tuta la note par travessarlo. Fin che'l ze cascà su pa i sassi e el se gà
catà n'tei fondi de la me tera.
“Tuti savèvino che, par lu gaverse perso de quele maniere là, zera parché el gaveva
passà co'l caval su de una peca del Orco. E anca se la zera la sata del caval e nò la sua,
quela pestada là la lo gà fato perder el rumo.
“Quel caso el gà sucedesto de verità!” –el feniva de contarla Gigion. “Magari che nissuni confonda con le pestade del Orco quei che perde la diression e i scomìssia a ndar a torno pena che i vien fora de la bodega. A quel fato se ghe ciama nantra cosa...”

Nenhum comentário:

Postar um comentário

Gostou?Comente aqui e se possível inscreva-se.

Topo