Sogno d`un Tosatel - Ademar Lizot

Ascoltemo la stòria con Ademar Lizot:

                                                          El Sogno d`un Tosatel

     

 Sti ani  quando zera giovenot,  gavea el desidèrio, mèio dir el sogno de andar trovar la bela Itália. Ntela Itália de mio sogno gaveva l`aspirassion de veder tante cose: 

In Roma trovar el maestoso Colosseo e sentà nte le so archibancade milenare far na preguiera par la ànima dei cristiani strassinadi soto l` bèstie de ferossità.  Dopo andar in pelegrinassion  al Vaticano e ntela ciesa de San Piero  mirar la "Pietà", scultura più bela de tuti tempi, che ritrata la Madona quando riceve ntei bràssi Gesù sbassado dela crose, vero capolaoro del scultor Michèlangelo Buonarroti.  Trovar anca el  Castel Sant`Angelo e pi avanti ntela Fontana Di Trevi trar zo  na moneda co`l  desidèrio de ritornar.   In Nàpoli ai piè del monte Vesùvio, trovar la cità d`Pompèia  e nte le so vie caminar compagno se fusse drio leder un libro eterno che parla sora el eterno dela vita.    In Firense davanti de suo Duomo (ciesa),  farse maraveia del  suo marmo verdo e nte quel paisàgio spetacolar dela Toscana caminar par i campi che Leonardo Da Vinci, gènio dela umanità, a tanti ani vanti ga caminà.   In Venesia, ntea piasa  d`San Marco, ricordar che la Serenìssima l`éra  capital d`un paese importante, un dei pi richi del mondo e par de pi de mila ani el idioma Vèneto l`éra parla in tuto el Veneto  atual, in varie ìsole del Mediteràneo e coste del mar Negro.  In Milano rento dela  ciesa  farse maraveia dela construssion maestosa e dopo caminar ntela  galeria Vittorio Emanuele.

            .             

                   Però el mio sogno zera próprio gradèvole quando me vedea ntel paeselo de nassità de mio nono, ai piè dele “dolmite”, Provìnsia de Belluno, cità de Cesiomaggiore, andove ga scominsia la stirpe dela mia gente. Poder pestar ntela tera che mio nono ga pesta e bever  àqua dela  medèsima fontana quel  ga bevesto la par sora i monti ntela mantagneria dei Alpi.

                   Intanto che nò rivea el grando momento de trovar la bela Itália,   sempre stimoleva mio sogno co`i libri che contea la stòria del Imperio Romano: Cezar, Marco Aurèlius, Nero, Vespasiano e tanti altri imperadori,  paroni del mondo quando ga scomìnsia el Cristianèsimo de nostro Signor Gesù Cristo. Zera sempre drio leder sora la stòria de  Michèlangelo, Caravaggio, Dante Alighieri e altri gènii  dela umanità,  pero soratuto regalea la mia fantasia co  la colession dei filmi de  Felini, Viscont.ti, Vitorio De Sica, Pietro Germi  e altri maestri del cinema Italiano, cossì  nte quel tempo de tanti sogni e fantasie, mio desidèrio zera tanto persistente, tanto elaborà che`l se ga torna el ogetivo de un giorno trovar la bela Itália.

Ademar Lizot.