Faustino e so Careta - Ademar Lizot

Ascoltemo la stòria spunciando soto:

                                  Faustino  e so Careta

   

Sti ani ntela località de“Fighera Alta”.  gavea un cristian de sàngue trentino ntele vene e quel zera paron d`una careta de rode de legno con siàpe de fèro e tirada par due tèrni de mule, Faustino Capellari zera el suo nome  e nte quel tempo che nò gavea mea camioni,  el fea el transporto de feramente, petròlio, café, sucro, sal e altri potàcii che nò gavea mea ntela colònia.  Con so  vècia careta el guadagnea el pan de ogni giorni e co`i viai quel fea, par quele stradete rusteghe fate a picon, piene de monti in su e rive in zo,  el cognossea na mùcia de picoli paesei, de sta maniera  tutiquanti lo  stimea, soratuto parvia de so caráter e bontà. Nel mistier de caretero el ga passà par tante dificultà, come questa che ghe conto adesso...      

    L`éra un giorno del veron del 32, quando al sciarir del di el ga partisto   con destin a la cità de Soledade, cinquanta quilometri a lontan.  Nel portafolio grava con suo nome el menea na sbranca de soldi, che i zera par comprar mercansie par la bodega del vècio Ferri. Al meso di el se ga ferma, par magnar e darghe aqua a l`é bèstie e come el zera adiantà ntel percorso, el ga fato na dormesta, de soto la ombria d`una pianta. Dopo de mesa ora el ga partisto,  meso indormesà e insemenio parvia del tempo massa caldo. Un pochetin vanti dele siè el ga riva a so destin, ntela casa de pasto dela fameia Fronza,  e ntel momento quel ga salta zo dela careta, quando el ga metesto le man ntele scarsele,  el ga sentisto che nò gavea gnente, alora el ga rissercà rento dela careta e par de soto dela bancheta, però sensa catar gnente,  nte quel sciantin ghe ga passà par i òcii un sciaro che el ga squase perso i sentimenti. Alora el ga pensa che l`éra probàbile  che el gavea stravià i soldi,  de soto de quela pianta quel gaveva riposà al dopo el meso di.  El vècio Fronza, paron dela casa, lo ga calmà c`un bicier de àqua e dopo el ga dito..- “.Diman matina ritorna a quel posto che pol esser che i soldi i ze ancora la”.  Matina bonora, a l`alba el ga ciapá  un caval de quei pròpio boni, un òtimo marciador e nte`un sciantin, vanti dele oto el ga riva nel  posto  quel gaveva riposà. Però dopo de rissercar de soto dele capoere,  e piante, no`l ga cata gnente. Alora el ga sentisto un fredo rento d`anima e  intanto che una furtiva làgrima la ghe sbrissieva zo par el viso, el ga pensa che anca i podea acusarlo de roberia.  

   

  De sta maniera el ga ritorna a Soledade  e ntela casa de comèrsio el ga spiegà la situassion,  el ga dito che se anca el gavea stravià i soldi, el gavea la necessità de menar  l`é mercansie. Dopo el ga afirmà che presto el andea vender la careta e i due terni de mule e cossì el podea liquidar el dèbito, parvia che el suo caráter e onestità zera la cosa pi importante.  El paron del comèrsio  ga acetà parche lo cognossea e savea che`l  se mèritea el  crédito.

 De matina bonora,  co la careta carga, el ga ritorna e nel transcorso del viaio el ga preguia a Sant`Antoni el Sichèri. Co la ànima indenòciada el ga domandà a so Santo de devossion, che el ghe desse la gràssia de recuperar í soldi. Nte quel viaio el se ga fermà sol par darghe àqua a le bèstie,    così vanti note el ga riva a la “Fighera Alta” e  davanti dela  casa de comèrsio, sensa dimora el ga salta zo dela careta, e intrà, par spiegar al paron la pèrdita dei soldi, però vanti de dir" bona sera" el ga visto par sora del balcon el suo portafoio co la panseta piena de soldi. Alora el paron ghe ga spiega che una bona ànima gavea incontrà el portafoio  co`l suo nome grava.

·           Ademar Lizot.