La bataglia del Monte Grappa

quarta-feira, 23 de outubro de 2019

Ascoltemo la stòria: 

Monte Grappa

El monte Grappa l`é localisà tra meso l`é provinsie de Belluno, Vicenza e Treviso, l`é anca el
pi grando dei pre-alpi Veneziani, con mila setessento e setanta cinque metri de altessa e ai piè
del monte se trova la cità de Bassano de`l Grappa. l`é anca un monte co`un grando valor
stòrico parvia che a cento ani indrio el sàngue dela gioventù veneta ga incarminà la so tera e
fiori, quando ga ocoresto la batàlia del Vittorio-Veneto ntela prima guera mondial. La stòria de
quela batàlia el nono me ga conta, nte`una narassion piena de orgòlio e anca de desolassion,
orgòlio parvia del testimònio de braura, sàngue e onor dela nostra gente e desolassion parvia
che tanti soldati, squasi tuti tosi del paese Veneto, i ga perso la vita in combatimento. Con
parole piene de emossion el contea che ntel mese de otobre del disdoto ga scominsia la lota,
quando el esèrsito Austroungaro ga afrontà la tera Italiana co na mùcia de soldati e armamenti
de modernità, i gavea de pi de due mila canone e metraliatrisse, intanto che el esèrsito Talian,
soto el comando del General Luigi Cadorna el zera scarso de armamenti, alora par far el
infrontamento, i se ga intrinsiera nel culmine del monte Grappa, andove i se ga reunio con tuta
la so forsa, insieme dei sentimenti de devossion a l`Pátria. I due esèrsite i se ga infrontà del
giorno 24 al giorno 30, nte`una lota de ferossità, sàngue e morte in che i soldati Alpini con una
braura mai vista, come se i fusse i gladiadori di Roma e i gavese insieme el spìrito gueriero de
Giuseppe Garibaldi, i ga derotà quel esèrsito pi forte del mondo e questa vitória ga fato finir la
guera nel frontepìssio italiano e anca la ga ocagiona la dissolussion del esèrsito Austroungaro.
Dopo cento ani, no semo mea boni de maginarse la soferansa che quei bravi i ga
infrontà, quando i ga combatesto nte`un tereno pien de dificultà in marciapiè su par el monte,
co´i armamenti e mantimenti sú par l`spale e soto el fogo de canone e metraliatrisse nimighe.
Di d`ncoi nel culmine del monte Grappa ga un sacràrio, un stragrando museo de la guera,
andove ntel corpo sentrale i ze depositadi i resti mortale de dodese mila soldati alpini e el
nome de quei bravi l´è grava ntei sassi del monumento maestoso. Noantri, dessendenti de
quela brava gente , gavemo el dover de cognosser la stòria de quela batàlia e davanti del
maosolèo, cavar el capel de la testa, indenociarse e dir na orassion per l`anima de quei bravi
che i ga perso la vita con coraio e onor a la Pátria Italiana.

“Òh Monte Grappa, Come sei belo!
Tu sei el maselo dela gioventù.
Òh Monte Grappa come sei alto!
Sei stà el desfalco dela gioventù!
Òh Monte Grappa, come sei grando!
Co tanto sàngue dela gioventù!

Òh Monte Grappa, come sei nero!
Gran cimetèro dela gioventù!
Òh Monte Grappa quanti dolori,
Gran traditori dela gioventù!
Òh Monte Grappa, come sei bruto,
Sei stà distrutore dela gioventù!
Òh Monte Grappa, rupi ferozi,
Con tante croze dela gioventù!”

Ademar Lizot.

Um comentário:

  1. Posso utilizar a foto do Monte Grappa acima para colocar em livro a ser publicado?
    Podem me informar o autor da foto?

    ResponderExcluir

Gostou?Comente aqui e se possível inscreva-se.

Topo