Ascoltemo la stòria
El miràcolo dela pipa del Nono
L`éra un giorno de quei meso
brina, meso piovesina, in che la nèbia la
ga dura squasi fin el mesdi, nte quel giorno griso d`un cielo nuvoloso, ga nassesto Agostina, de sete mesi
la ga vignesto a questo mondo, picinina de proporssion e granda de cuor. Transcorea el mese de agosto del ano trenta
due e el suo pupà, in quela matina, el
zera ntela rossa, drio taiar formento, parvia che no`l se spetea che la rivesse vanti del tempo e quando
el tosatel che sempre ghe portea la colassion, el ga vignesto in tuta sbandada
e osando a tuta vose par dir che bisogneva tor la partera, parvia che la so sposa la zera
in patimento co`i sudori del parto, alora el se ga disisperà, parvia che ntel càlcolo dela so
femena, solamente nel final del mese de
otobre gavea de nasser sto bambin. Svelto el ga ndato tor la vècia Pierina, che gavea el afar de partera e che con so man
benete la gavea iutà ntela nassità dela maioransa dei bambini del paesel, però quando la ga rivà, i ga visto che podea èsser
massa tardi, parvia che la madre la zera drio smarirse in sàngue e quel gavea
de èsser un parto difìssili. De sta
maniera, co la ànima piena de aflission,
la vècia Pierina, la ga sentisto che nò la podea far gniente, par salvar la
vita de quela madre. In quei ani scarsi de dotori e ricursi, na mùcia de done
perdea la vita nel momento del parto. Alora
la se ga parecia par salvar la bambina e quando la ghe ga taia el cordon del
ombìgolo, la ga confirmà che ntel
s-ciantin che una vita rivea a questo
mondo, nantra andea via, però podea èsser massa tardi anca
par la bambina, parchè ghe parea che nò
la tirea mea el fià, alora con determinassion la ga tentà far la reanimassion,
però sensa èsito e nte quela aflission el
pànico se ga stabilio, co la madre morta,
smarida in sàngue su del leto e quela situassion pròpio disperadora sprimeva el
esaurimento stigà par la paura de perder anca la picinina. In quel momento quando parea che i gavea perso la speransa, el
nono ga intrà ntela stansa, co la so pipa in boca e
so sapiensa in testa, svelto el se ga tirà darente dela bambina, la ga sguarda con òcii de chi ga alsa su tredese fioi e svelto el ga tira fora nantra
pipada e d`un colpo el ga sufià quela fumana in diression del naso dela bambina,
che de sùbito la ga tossisto e pianzesto
a tuta gola, come fà i inossenti che vien a questo mondo.
Dopo dei sèi primi mesi la ga
cressesto compagno de un sipreste e la
ga caminà e parlà vanti dela seconda
fiorada dele vigne e tutiquanti, no i gavea mai visto una bambina cossi incantadora,
che menea alegria nte`una casa coerta de
luto: Cossì la ga cressesto e daventà una tosa belìssima, con i bei òcii negri dei Arossi, cavei negri anca quei, ma co la pel ciara e la fisionomia piena de
delicatessa e soavità, de ìndole forte,
però sensa ruspeghessa, e soavisà par un cuor sensìbile e entusiasmà in soi
afeti e questo carater gavea la someiansa del carater dela so madre, che la
zera una dona amàbile, piena de suavità e dolcessa compagno de una colomba.
Quela pipa miracolosa che ga mola par ària quela fumana benedeta, in quela matina meso brina, meso piovesina, d`un giorno del agosto de trenta due, el nono nò la ga mai pi doperà, la zera sempre
rento de una cassetina de veludo, parvia che la gavea daventa una relichia, mèio dir un precioso amuleto che portea bona fortuna e anca la
confirmassion che gnanca la tera e gnanca el cielo i pol interomper una vita.
Cossì ga passà i ani, fin che
nte`una domènega vanti el scurir del di, el nono ga ciapà la so relichia rento dela
cassetina de veludo, dopo ntela solitudine dela veranda el se ga sentà ntel suo caregon predileto e con la britola in man, con pasiensa el ga
taià el fun, con caprìssio lo ga acomoda
ntela pipa e con piaser lo ga
infiamà come se fusse la ùltima volta quel fea quel mistier e dopo a
ogni pipade quel fea, la fumana se alsea
su in forma de sìrcoli come sei fussi ghirlande de massolini de fiori, menando al
cielo i sinceri ringrassiamenti al Signor, par la grandiossità dela vita e per la
luce dela so bontà e ntel s-ciantin che el ga mola par ària la fumana de
so ùltima pipada, co la fàcia iluminata de
serenità e pace el ga dato el ùltimo sospiro.
Ademar Lizot.
