Programi de Cultura Taliana - Ademar Lizot

Ascolta la stòria strucando soto:

 

                 

   Del pupà e dela mama go eredità el àbito de saltar su del leto de matina bonora par dir na Ave Maria a la Madonina e un Padre Nostro al Signor-Dio e, dopo intanto che bevo el simaron, me piase  scoltar i programi de cultura taliana,  che in meso a tanti avilimenti e desgusti de questi tempi, i mena a nostro cuor pace e cantantessa e sempre con la esaltassion dela  cultura dela imigrassion taliana e, la glorificassion dei costumi e esèmpio de vita dei nostri antenati e, el mèrito de questo brau laoro l`é postà su par l`spale dei ràdio-divulgatori, persone compagno Jaciano Eccher, Walter Buffon, Ernane Fasolo, Jacir Grando e tanti altri che par i so nomi cavar fora, bisognaria de pi d`ora. De sta manera no se pol mia misurar el grando valor dei programi taliani, quei ghe mete par ària  dolce cancione che inspira tanto sentimento e, che bele stòrie che se pol scoltar, tutequante scrite co una onesta semplicità che racontade co la vose carga de vibrassione de pace e fraternità, l`é  fà vegner carissìmi ricordi de`n tempo indesmentegàbile che`l vent ga sufià par i confini del firmamento, quando el ga menà insieme el nono co so mostàcii gialdi de paia e tempo e, la noneta, la nostra nona taliana, che stesso a ela mai più ghe`n sara ntel mondo e, se i fussi vivi d`ancoi, maginarse la so emossion de poder scoltar  una programassion completa parlada ntela so lèngua materna, che  no la ze pi una lèngua maledeta, parchè adesso se pol doperarla  sensa rìs-cio de andar in preson.  Sicuramente la so contantessa gavaria de oltrapassar i limiti del imaginàbile ntel s-ciantin de scoltar el grando Valdir Anzolin co so vose rimbonbante, o fursi i bravi Ragazzi dei Monti co la so mùsica che incanta e, anca  tanti altri corai e congiunti musicali pròpio bei de sentir insieme dela bela  poesia del genial professor Luzzatto, che dis:...

“Come l`é bela la nostra lèngua, come l`é melodiosa e poètica,

Basta parlarla con orgòlio e alegria,

Mai con paura, o co la boca streta e vergognosa,

E si con onor, con tanto amor e simpatia.”

Ademar Lizot.