Vècio Getùlio - Ademar Lizot

 Ascolta 'l àudio:

             

                                Vècio Getùlio  (Per Ademar Lizot)

      A una sbrissa de ani indrio, nte`una matina freda de lùio  go cognossesto el vècio Getùlio,  l`era la par l`é nove e ricordo quel gavea el vardar perso no so mia ndove. El zera fermo, sentà nte`na bancheta dela piasa, co un masseto de garòfoli rossi ntele man e, quando un moschin ghe ga posà ntela fàcia  el se ga movesto e,  una lus ghe ga insidi ntei òcii come se fussi el riflesso dei  rossi fiori.   Alora lo go saludà parche tuti i nostri vècii i ze gente degna, che de tuto i sà un poc e, i se mèrita tuto el rispeto, soratuto in questi tempi in che ciare persone porta rento del peto el sentimento de simpatia e fradelansa, ma dopo de saludarlo e domandarghe el nome, el ga restà fermo, sicuramente co`l pensiero volta a qualche  ricordo del passà, parche l`é  n`mania dei vècii esser ligadi al passà e, se anca i ga sofresto parvia de qualche sassada  che la ghe ga marca ntela ànima, ncora cossì i se rifugia ntel conforto dei pensieri par dissimular i  cativi ricordi, i ze compagno de`n mul vècio e strupià che no`l serve pi par tor fen ntel prà,  che parvia dei denti marsi no`l magna pi milio solche capin, ma ncora el sente saudade dele  sgorbe su par l`é spale.

    Nte quela matina freda, ciara e serena de lùio, quando lo go visto sentà ntela bancheta dela piasa, me ga comovesto la so figura ùmile e bonassa e, go capi che su dele so spale no`l gavea solche età, ma si tuta una stòria, parche un omo no`l ze mia come  una pianta nassesta de una semensa, ma si una ànima che dela mama  ga scoltà parole de dolcessa e, del pupà  ga tira ensegnamenti e, fursi se anca el ga cressesto sensa afeti,  meso sbandonà  come un cagnet sensa paron, ncora cossì el se ga fato omo e bonasso de cuor, ma fin certo punto, parche  pol esser che sensa esser rabioso, el zera anca cativo e,  se qualchedun che pestea dosso el ghe dea el troco, a le volte el più tanto che la giusta quantia, ma  sicuramente el ga sempre rispeta dei preti, la batina, dela polìssia el fardamento e, dele done e bambini el osamento.

    Adesso  el vècio Getùlio quel gavea el vardar perso no so mia ndove, el  riposa de soto de una tompa che ga par sora un masseto de garòfoli rossi ornati de gilii bianchi compagno l`é ale de una colombina.

Ademar Lizot.