Contadin ntela Capital - Ademar Lizot

segunda-feira, 12 de julho de 2021

Ascolta la stòria strucando soto.

  

 Sbassa sto àudio strucando qua.

 


                                   Un Contadin Ntela Capital (Per Ademar Lizot)

       Transcorea i ani otanta, quando mio vècio pupà  gavea squasi setanta e, ghe ga tocà de andar a Porto Alegro in serca de dotori. Quela l`é stà la prima e anca la ùltima volta che'l ga cognossesto una cità granda. El ga ritornà casa dopo de`n mese e, meso stufo el ga dito:..

- “L`é meio sapar soto al sol, che viver nte una grande cità e, a mi, no i me ciapa mai pi nte quel paese con  tuta quela gente chi va e chi vien de partuti í cantoni, sensa rivar a parte nissuna, tutiquanti sensa saludarse, come se i gavesse perso la tramontana, de òcii spalancadi e fàcia de cativi e, che brute robe par travessar le vie, alora si... 

- “Madonina aiùteme”, parché se resta meso mati e, bisogna pròpio una pasiensia de mul vècio e star su co le récie parché  ga de pi  automòbili che moschin e, no i te assa mia travessar in pace, no i rispeta gnanca  la fassa de sicuressa e par disgràssia í mola fora na fumana  che fà smarsir tuta l`ària che se repira. Nte quele bande l`é pi fàcile catar la mancansa de moralità e rispeto, che una sboconadeta de pura arieta.  Ma el pedo de tuto l`é che bisogna star atenti par no assarse imbroiar, no se pol mia fidarse de tute le bele parole, parché la maioransa dele persone l`é ga sùlchero in boca e velen nel cuor.  No son mia bon de capir come che quela gente pol viver cossì a rabalton, che speransa che'i transmite ai so fioi? Che vision de futuro i pol ofrir ai nipotini?  Sarà che no i ga mia el capimento, che quando no se rispeta dei vècii l`é rughe e, dei bambini l`ingenuità, se va in serca del pròpio fin?

   Pòvero pupà, quela volta el ga ritornà casa cossì stufo parché el zera un contadin del tempo antico, quando l`onestità e el rispeto i zera enti consagradi e,  quel mese che'l ga passà ntela capital el se ga senti come un caval vècio fora del potrero,  parché quel bacan dela granda cità l`éra terìbile par l`é so rècie, acostumade solche al canto  dei oseleti e al ciacolamento de rospi e rane nel paltan. Ntela so aotentissità no l`éra mia bon de capir, come se pol viver scarsi de fradelansa e, sensa importarse con l`aria che se respira, sensa sentir el bon odor del vent, purificà par una piovesina co`l profumo del pin e, pol esser che'l gavea pròpio rason de dir che l`é preferìbili sapar soto al sol che viver ntela cità granda.   

Ademar Lizot.


Nenhum comentário:

Postar um comentário

Gostou?Comente aqui e se possível inscreva-se.

Topo