Ritratista del Tempo Antigo - Stòrie del Lizot

Par sbassar sto àudio struca qua.

Par veder tute le Stòrie del Lizot struca qua. 

Ascolta la stòria:

 

                      

      Ritratista del Tempo Antigo (Per Ademar Lizot)

     Tante volte i mei ricordi i ze sconti ntel profondo de`n ritrato, tanto antigo quanto la stòria dei mei antenati e, quel ritrato in bianco e negro, ornà de saudade e tempo, me fà ricordar del ritratista che a tantìssimi ani indrio lo ga tirà.  Zeferino Pagnussat l`éra el so nome, ma tutiquanti lo ciamea  de Zeferino Mesagamba, parchè dopo del sgagnon de una bissa giaralaca el ga restà co la drita pi curta che la sanca e, quando el ga assà là de laorar de contadin, el ga imparà dela fotografia i fondamenti. La prima càmera de tirar ritrati, el ga compra co`i soldi de na giunta de bovini che`l ga vendesto e, pianpianin el ga conquistà na tènica sufissiente par far el laoro de ritratista,  cossì el ga  registràr l`imàgine de tantìssime persone, momenti e sentimenti, come sei fusse na picinina frassion dela eternità.  El fea el suo ofìssio sempre co profissionalismo e simpatia, par i tosatei che`l ritratea el gavea sempre na scarselada de dolci e par l`é done e tosse un massolin di fiori, cossì el zera cognossesto in tuta la colonia. Par andar in torno el lighea co na cordeta  l`càmera de tirar ritrati, ntel portabagàlio dela bissicleta, dopo la par i ani sessanta el se ga comprà un zipe Ford modelo 44, na relìchia dela seconda guera mondial, una màchina de fedùcia, pròpio giusta par transitar in quele strade sensa asfalto.

     Nte quel tempo, i ritrati fora de esser solche in bianco e negro, i zera anca un vero lusso che l`maioransa dele persone nò podea mia pagar e, ntel s-ciantin de esser ritratadi, i ivitea de sorider davanti dela càmera, fursi parvia dei denti massa bruti, fursi parchè par s-ciocar cada ritrato dimorea de pi de diese minuti  e, nissuni suportea mantegner el soriso par tanto tempo, anca vergogna de sorider i gavea, parchè rider zera considera una stravagansa riservata solche ai ciuchetoni, altri tanti che`i  restea co la boca ciusa zera i sparagnoni, parchè ghe dispiasea guastar soldi co`l retratista. El fotografea anca persone e bambini pena morti,  parchè gavea un alto  ìndice de mortalità de fantolini.

   E al finir questo relato, ringràssio a Zeferino Mesagamba che`l gavea la drita pi curta che la sanca e, traverso de so nome ringràssio  a tutuquanti ritratisti del tempo antico,  che con suo brao laoro i ga eternisà  i òcii de dolcessa dela mama, el sguardo iremobìli del pupà, i mostàcii gialdi del nono e, i cavei grissi dela noneta. Con so màchine primitive,  i ga registrà l`imàgine de`n mondo che` l vent lo ga sùfia par i confini del firmamento e, no`l ritorna mai più.

 

   

Ademar Lizot.