Gilii Bianchi e Garòfoli Rossi

sexta-feira, 29 de outubro de 2021

 Par scaricar el àudio de sta stòria struca qua!

Par ascoltar la stòria ntel vose del scritor, struca ntel "player" soto:


         


                           Gilii bianchi e Garòfoli rossi

  I mei antenati i riposa nte`n campo santo par sora de una colina, ndove el vent fà na cantiga de ninar a  so ànime e, sempre che vau visitarli porto insieme un masseto de fiori, bei e profumadi. Par la mama e la nonina, gilii bianchi come l`fácia dela Madonina e, par el pupà e el noneto, garòfoli rossi, come el vin che`i ga bevesto. Nte quel momento davanti dela tomba, sero i òcii e, me vien el sentimento che co`l permesso de San Piero, i ze qua zo in tera, in torno a me; l`mama co so sguardo de dolcessa, el pupà co so man pesade de contadin, l`nona co so fassoleto in testa e, el nono co so pipa in boca. Alora ntela solitudine de quel silensio luminoso, profondo e maestoso, dela m`ànima indenociada vien na preghiera e, dei me òcii  una furtiva làgrima, la più dolorosa, la più difissile de soportar parchè spandesta par sora de ndove  riposa la mia gente, che ntela tera i ga serca sogni de pace e libertà.

 Dopo, ancora respirando quela ària  malincòlica, pesada, che alsa sù el odor del passà, sguardo  tombe piene de umiltà, con crose de legno, fate a colpi de facon, come se le fusse la imàgine de tuta una generassion quel tempo serca de anichilar. Sguardo anca suntuosi  mausolei, piene de ghirlande e crose de belissimo marmo e,  me vien in mente che tuti quei che riposa drento de quele tombe piene ùmiltà e suntuose mausolei, i ga la medèsima someiansa, la medèsima condission, parchè i se uguala ntela insignificansa, parchè nò ga più gnanca una difarensa, parchè questo l`é el riposo dela umanità, el fin del calvário terestre, ndove el sospiro de grandi e pecinini no`l  ga gnancaun valor dissolvesto ntel medèsimo polver.

Vanti de ndar via del campo santo col fassoleto sugo l`lagrime del viso e, dopo del segno dela Santa Crose, sguardo nantra volta el masseto de garòfoli rossi come el vin dela ua del noneto e, i gilii de incantadora bianchessa, come l`fácia dela Madonina.

Ademar Lizot.                              


2 comentários:

Gostou?Comente aqui e se possível inscreva-se.

Topo