Pel Castagno con Manciete Bianche - Ademar Lizot

 Scarica el àudio strucando qua.

Ascolta la stòria strucando soto:

                    

Pel Castagno co Maciete Bianche (Per Ademar Lizot)

    Sempre ringràssio a Dio par i genitori quel me ga destinà,  ànime gemele che`i se volea tanto ben, i zera  de`n tempo quel fogo del fogolaro mai se stusea e la fradelana del cuor mai se finissea.  La mama sempre contea che quando i se ga maridà, de suo i gavea solche speransa, fede in Dio e,  voia de laorar. Del suo insoval la se ga porta adrio, solche le querte, una imàgine dela Madonina e una pignata de fero par cosinar la polentina e, el pupà che solche co le gambe rento de una bombàcia el se sentiva a volontà, el ga porta el più presiosso ben che`l gavea, un caval che tanto stimea,  un roano co maciete scure, che altiero trotea par tirar la caretina, par ndar a mesa  domènega de matina. Dopo de`n tempo i se ga compra un tochetin de tera, ndove i ga alsa sù na casetina fata a colpi de manera e, i primi soldi che i ga vansà i ga compra na vacheta de pel castagno co maciete bianche, picinina, ma co le tete de bon tamagno.  El suo laoro zera  proderer el late e, generar un vedel al ano e, cossì i restea sempre  atenti, se la gavea qualche guaio,  pansa sgionfa o,  sicatrise che nò se curea, alora i ciamea el vècio Lino, un contadin speriente, che sensa gnancaun stùdio, el laoro de veterinário el fea.  Quando la ga partori la prima cria l`é stà un momento de aflission, par la paùra de`n parto difìssile, ma dopo de mèsa ora, de òcii verti drio scrutinar el novo mondo, una bela vedela vignea fora. Alora la vaca lechea la plassenta de so cria, che in mèno de diese minuti, se alsea sù ntei denòcii e dopo in piè, in serca dele tete de so mare, par ciuciar el primo late, una dele imàgine più bele dela natura, che assea tuti  contenti, parche una vedela representea la sicuresa de più late, l`éra pròpio na festa, come se gavesse nato un membro dela fameia. In pochi giorni se podea scominsiar a molzer la vaca e, se gavea disponibilità de erba e fen, due volte al di, de matina bonora e al s-curir, parchè el late el zera tanto importante par el magnar de ogni giorni. Parte el zera dela vedela che ciusiea e, altra destinà par bever,  par far el butiro e el formaio, che bisognea speriensa, pròpio un don special par farlo e, anca star atenti co la igiene, quando el scominsiea a daventar sòlido, se netea due o tre volte al giorno, fin quel ciapea la crosta dura, alora el zera involvesto in foie de fighera e deposità ntele scansie dela cantina e, quando scominsiea a esalar par ària quel odor profumado e pungente, alora insieme de salam, polenta e  vin se magnea del mondo el mèio merendin.

   E cossì finisso questo rilato de`n tempo de semplicità, un tempo in che i valori dela felicità, no`i zera mia ligadi  a un consumismo descadenà.

Ademar Lizot.