El Patimento de Mariantonia - Ademar Lizot

Struca qua par scaricar sta stòria in áudio

Struca soto par ascoltar la stòria

                        

                  El Patimento de Mariantonia  (per Ademar Lizot)

  Mariantonia l`éra una ragassa de povari contadini fiola, che dopo de maridada, sensa maginarsela cosa che ghe spetea, la ga scominsià la nova vita de sposa ntela casa dei sòceri, come ghe tochea a squasi tute l`fidansate sti ani indrio ntela colonia, par far parte dela fameia del sposo e, esser rispetada come una sorelina de tutiquanti. Però tante volte, la giovane nora nò gavea mia nissun poder ntela nova fameia e, ghe tochea de solche obedir e basta. Ubedir a la sòcera e, dela stesso manera a tutiquanti.  Nte quel tempo i dissea:...“-Se obedir impara!”  

  Cossì che  ga tocà a Mariantonia.  Ntei primi giorni la ga fato de tut par conquistar l`simpatia de tutiquanti, però sensa èsito co la sòcera, una dona tirànica, gelosa de so fiol e, parona de una maschinità mai vista compagno, fin el magnar la controlea, pan salame e formaio i zera ciusi e, la ciave del armàrio rento dela scarsela dela so traversa. Se Mariantonia fea qualche reclamassion la ghe dissea:...-El to laoro l`é obedir, far fioi e taser! Cossì presto la ga capì che nte quela casa contadina, nò la passea mia de`n sèmplise serva.

  In constante patimento la ga passà i primi mesi  del matrimònio. “ -Parchè saralo che la me òdia cossì tanto, se son mi che ghe fau tuti i laori e, mai ghe also sù la vose.” Ma so sposo nò savea dirghe gnente, pròpio sensa coraio par difenderla, parchè el suo poder ntela fameia  el zera stesso  zero e,  ghe tochea de solche obedir e, rento de questo contesto, in modo imperdonàbile el assae far cossì con so giovane sposa.     

Soto òrdine trascorea i giorni de Maria: ‘- I ghe dissea...- Maria và tor aqua da bever ntela fontana! Maria và predere el vin in cantina!  Maria và darghe de magnar a le bèstie! In soma nte quela fameia tutiquanti davano òrdine a Maria e, Ela svelta corea e obedia e, quando le òrdine zera tante che se inmuciea, alora la situassion se fea insustentàbili e, pèdo de tut che mai la zera consultata sora le cose importante che la gavea de far e, con quela bruta situassion ghe tochea de portar passiensa, parchè no la gavea mia poder de ndar via, scarsa de robe, sensa soldi e, sensa la possibilità de ritornar a la casa materna. Parea fin quel so destin l`éra star de soto l`òngine dela sòcera, una situassion perìcolosa che afetea i so nervi.  

  E quando una bela bambina la ga guadagnà, la ga pensà che vita gavea de serenar. Ma desgrassiadamente la se ga sbàlia, parchè el so sposo e sòcera i spetea un bambin maschio, i volea tanto un tosatel e, Ela  ga partori na toseta e, cossì ga seghi el patimento de Maria e,  sicuramente la soferansa l`é stà la causa par perder el secondo bambin, parvia de`n aborto spontàneo. Alora la ga intrà in profonda depression, una soferansa che ghe ga rovinà l`ànima, una malatia che nò gavea mia ancora i medicamenti par tratar.

  Fin che nte`n un giorno grisso de outun, vestita co`l vesti bianco del matrimònio e ntela testa un vel de color viola, la se ga impicà in cantina e, se anca el col spacà, co`i òcii spalancadi parea fin che la vardeva a tutiquanti, come che a dir: -Parchè saralo che la me òdia cossì tanto!

Ademar Lizot.