Capitel de Santa Luzia - Ademar Lizot

Scarica la stòria clicando qua. 

Ascolta la stòria clicando soto:

 

El Capitel De Santa Luzia (Par Ademar Lisot) Par rivar a la casa sentenària dei noni se camina par una stradeta postata tra mèso el bosco e el prà, ndove esiste el capitel in omàgio a Santa Luzia, quela dei òcii cavadi via. El tempo de esistensa de quela picola cieseta go perso dei ani la conta, ma posso dir che transcorea i ani trenta del sècolo passà, quando el nono Umberto in paga a una gràssia ricevesta, de sassi e matoni sù lo ga alsà. Ntel giorno dedicà a Santa Luzia, tredese di desembre, i lo ga consagrà co la selebrassion de una Santa Mesa. De matina bonora el nono e fioi i ga neta in torno, par tirar via tochi de piante e erbe e, l`é tose ga racoltà fiori par far una bela guirlanda in arco, sostegnada co taquare e foie de cochero ligadi con sipò. Vanti l`é diese, montà nte`n cavalin più manso che`n piegorin, ga rivà el prete Santo Dalbosco, de capel co´l capùcio rotondo, stivai sanfonadi e batina piena de botoni, el parea fin de quei tempi una scoltura. Par riceverlo, insieme dei visini, i se ga parecià con l`é mèio robe. Intanto che l`campanela sonea e, una toseta un canto litùrgico intonea e, tutiquanti saludea el prete, par domandarghe benedission e dopo darghe un baso ntela man, un baso rispetoso, un baso de amicìssia, un vero segnal de rispeto. Don Dalbosco, el zera una persona pròpio cortese, che saludea tutiquanti, cossì de man in man, par domandarghe el nome e de che fameia oriundi. Dopo de quel ritual, co la passensia de chi nò ga mia dèbiti a pagar el ga improvisà el altar par sora de`n toc de pianta e, sentà nte`n bancheta fata a facon, el ga confessà i fideli. Dopo el ga tirà la lession oral del catecismo ai tosatei dela prima comugnion e, se qualchedun nò savea mia l`lession, ntele rècie el ghe dea un tiron. Ntel momento de dir la Santa Mesa, el ga metesto par sora dela batina la alba bianca, dopo la stola rossa e piaseta dorada, quela carga de sìmboli litùrgiche e, ntel momento dela prèdica el ga raconta la stòria de fede e coraio de Santa Luzia, che se anca i òcii cavadi via, mai la ga perso la so fede. Una s-cianta al dopo el mèsodi la serimònia se ga finì e, el prete l`é stà invità a pranzar ntela casa dei noni Umberto e Carolina, che i gavea parecia galine al brodo e testa de porcel rostida al forno, el magnar predileto del Santo prete. Cossì finisso questo rilato, de`n tempo in che se anca nò se gavea mia squasi gnente, se scompartia squasi tuto, parchè el sentido dela vita zera la fameia, el laoro e la fede ntel Signor-Dio. Ademar Lizot.