Chi Sparagna la Gata Magna - Ademar Lizot

Scarica la stòria clicando qua.

Ascolta la stòria strucando soto.

Chi sparagna la Gata Magna (Par Ademar Lizot) Francesco Clemente l`éra un contadin che ntela infansa el gaveva cognossesto la povertà e, ntela veciaia, avaro e sparagnon el ga daventà. I so fioi i savea che soldi, argento e oro, quel gavea acomulà, i zera depositadi nte`n scàtola ben sconta in un posto che solche Lu cognossea. Però nissuni savea che dadrio del spècio quel vècio petenea i cavei, el gaveva sconto un mapa che indichea el esato punto ndove l`éra sconto el tesoro e, anca no i podea mia imaginar che rento del portafòlio gaveva un bilieto, una indovinela cossì scrita;.

 -“Se par desgrassià me toca de sparir de questo mondo, el mapa par incontrar el mio tesoro, el ze postà dadrio del riflesso che par tanti ani ga sguarda el mio viso.”

 Magari el zera avanti co la età e, repentinamente un ataco fulminante lo ga copà. La prima persona che lo ga incontrà, l`é stà la serva dela casa e, quando la ga visto ntele scarsele del morto el portafòlio co una sbranca de soldi, svelta lo ga scondesto rento de suo bustin el suo portatetone. El vècio no`l se gavea mia ancora sfreda rento dela tomba, quando i so fioi i ga ndato in serca dela scàtola del tesoro, però sensa esito. La serva co`i soldi la se ga compra un novo vestì e, cata fora un novo moroso. Alora i ga sospetà, parchè i savea la bagatela che la guadagnea. Nte`n s-ciantin la ga confessà so colpa e, restitui el portafòlio ai fioi, che i la ga perdonà par via dei ani de laoro che la gaveva ntela casa. Rento del portafòlio gaveva ancora el bilieto e, al leder el bilieto i se ga spaventà co la relassion sora la risserca dela fortuna sconta. De sùbito i ga capi la indovinela e, svelti i ga varda dadrio del spègio, però el mapa gavea spari. Alora come la serva non savea mia leder, i ghe ga domandà se quachedun altro gavea lesto el bilieto.

 -Solche el mio moroso, la ga rispondesto e, el me ga dito che l`éra scrito el indirissio de una amante del vècio e, par in rispeto a la fameia, l`éra mèio non dir gnente a nissuni e, dopo de quel giorno el me ga scampa via e, non lo go più visto. Alora i ga capi che quel fiol de`n can, moroso dela serva, el zera el ladro, che gavea robà el mapa e porta via el tesoro. Dopo de sei passa mesi ga vignesto la notìssia che un giovenot gaveva comprà ntei campi de soledade, una stansia con de pi de mila boini, confirmando quel provèrbio trentino che dis...”Chi sparagna la gata magna!”

  Ademar lizot.