El ferer - Stòria de vita de Dovìlio Spillere -Par Fábio Dalló

segunda-feira, 3 de janeiro de 2022

Par scaricar sta stòria struca qua.
Par ascoltar la stòria struca soto:



el ferer

Fiol de Beppe Spillere e Catarina Feltrin, nato a Nova Veneza-SC a 17 de otobre de 1921, Dovílio Spillere zera el pi vècio e par questo gavea anca una responsabilità granda, tanto par aiutar so pare e so mare, come tuti fradei. So pare beppe zera dotore dei ossi e denti, scerifo, murator, fea caciassa e sucro, taiea tole e anca laorea ntela agricoltura.

Giusto che vegnaria un grando omo, con tanta resposnsabilità e laoro, gavea imparà de tuto. Ma pitosto de racontar la so stòria, toca dirghe che la mama Catarina Feltrin fea laoro de levatrisse, e anca me par che la ga aiutà de pi de mila putei a nasser. Pròprio una benedission.

" Vien menarme par star lì con te, non son bona pi de star in questo boscheto. Basi e struconi, Rosa ". Queste poche parole ga cambià la so vita, parché Dovílio in 1939 ze ndà laorar a São José, Nova Veneza, par imparar la profission de ferer, ndove el gà cognosesto la Rosa. Dopo Dovílio se ga cambià par laorar a Azambuja, Pedras Grande e nel 1942 ga ritornà a Caravaggio e sposà con Rosa Maccarini, che vegnaria esser " El Sataron " dea so longa vita.

I ani ga passà e nel 1943 ze nassesto el primo fiol e cossí fin a 1970 Dovílio e Rosa gavea 17 fioi. Alora Rosa se mantegnea da tender la casa e darghe de magnar a i fioi, intanto che Dovilio laorea par guadagnar schei.

Sempre ben parecià, cola so vestimenta nera, zera un omo alto, magro e quando volea far braghe nove, portava le bombasine bele par el sartor Olízio Gava che incoi ga 93 ani e se ga fato sartor a 72 ani.

E quel posto che se ciamea Monte dea Misèria, in 1942 ga scominsià so nova stòria; ze vignesta fora la prima fereria de Dovilio Spillere. Ntela dècada de 40 fin incoi, una mucia de industrie ze vegneste fora, cambiando el Monte dea Misèria, ndove gavea sol sassi, par un novo paese che move sto brasile, el Caravaggio, dei sassi ga fato el pomo.

Sempre intorno la so comunità, aiutava da par tuto. Se fesse una scola, menar al dotor, ciese, clubi, giugo de bola e anca el ga ricevesto el laoro de scerifo del Caravaggio. Con una forte fede in Dio, Dovílio e Rosa ga portà la stessa fede ai so fioi. Con so FORD 1948, Dovílio ga fato tante viàgii a Porto Alegre-RS par menar tégole o qualche robe de pi par la construssion dea ciesa de Caravaggio. E a otobre de 1967 ga restà pronto el santuário dela Madona del Caravaggio e 12 mila persone ze vegneste par la inaugurassion, pròprio vero un miràculo.

Questa stòria ze un pìcolo omaio che mi, Fábio Dalló, go fato a Dovílio e Rosa Spillere. Tocaria scrìvere tante parole de pí, ma fenisso qua, saludando me amico Benício Spillere , un grande storiador e anca Mariana Panato e lasso i nome dei fioi di Dovilio e Rosa, disassete fradei che i ghe porta avanti questa brava stòria. Un grande strucon e steme ben : Eneval, Ivete, Odete, Édice, Irlene, Ambrósio, Dionisio, Délcio, Clésio, Alvani, Eugênio, Albertina, Lúcia, João, Marcos, Vera e Domingos.

2 comentários:

Gostou?Comente aqui e se possível inscreva-se.

Topo