Cosa che se dise del vin - Fábio Dalló

Par tuti i cantoni del mondo, el vin vien fora come una grandesa dea ànima. Sia insieme col cibo, col laoro, con una festa, amici o pure solo.
Vedemo alora, un poche de righe, che se dise del vin...

Se casca el vin per tera, ghe dise che ze un segno de sfortuna. Alora, ciapa un poco de vin col deo e buta par drio la recia. E nantra volta tornarà la fortuna.

Ma in Romania, el vin ze butà un poco per tera aposta. Cossì i amici che ze belche morti, pol bever insieme con noantri in vita.

Ntela Africa ossidentale, el paron dea casa ze sempre el primo a bever, cossì el porta fortuna anca ai visitanti.

I tedeschi dise che quando se fa la racolta dea ua, toca cargarla e transportala col caro dei bo, cossì non ga el perìcolo de restar smarsa.

Anca i tedeschi ghenà el costume quando muore qualchedun, se deve smisiar le botilie dea cantina de questo morto. Cossì el vin resta bon sempre.

Nel Egito antigo, quei che credeva nela vita dopo la morte, quando i siori èrano sepolti, se metea rento del casson del morto, una botilia de vin. De questa maniera, sto morto fea un bel passaio e quando se catea insieme, lori podea beverlo.

In Lituania, nela note de nadal a mesanote, quando tuti i resta mesi ciuchi, i ghe dise che le bèstie ze bone de ciacolar tra de lore. Se qualchedun vede, pensa che ze el efeto del vin.

In Portogalo, i pescadori nei giorni de mar cativo, i tra via el vin nel mar, e con questo el mar resta calmo.

El batèsimo dele nave, se spachea una botilia de vin su la proa dea barca, sìmbolo de purificassion. Se la botilia non spachesse, zera segno de sfortuna.

Quando i ebraici se marida, lo sposo spaca un bicier pestando con le scarpe, intanto i invitadi i grida “Mazal Tov” (bona fortuna). Alora, tuti i sa, che la vita de scapolo ze finita.

Ogni botilia de vin voda, ze sempre piena de bele stòrie. Se una cosa bona sucede, bevemo vin. Se qual'cosa de bruto vien fora, bevemo vin. Se non sucede gnente, bevemo vin e aspetemo che qual'cosa sucedera. E par fin, ve lo digo : " El meio vin non ze quel pi costoso, ma si quel che bevemo coi amici " .

Fábio Dalló.

Osservassion: Son drio scriver questa roba, bevendo vin.