Incoi ze el di 3 de abril de 1985...

Par scaricar el àudio clica qua.

Par ascoltar el àudio clica soto.

- Toni ndemo!! Ancora drio dormir? Leva su del leto Toni, va la fora giutar to sorela molzer le vache.

Zera el di 3 de abril de 1985, mèrcole de una Stimana Santa. Bepi romai zera desminsià a de pi de una ora, el gavea fato fogo ntel fogolar a legna, parecià ben el mate e adesso, 6 e mesa el sol scominsiea vegner fora tra nùvole negre e rosse anunciando una giornada de piova.

El tosato prima del osamento che Bepi ga fat oel zera drio dormir, la fiola Giuliana e so dona Marieta le zera drio molzer le vache.

Toni se alsa tuto despetenà e col muso in fàcia parché el volea dormir nantro poco. El va ancora coi òcci medi saradi nel seciàro dove gavea una sécia piena de àqua dela fontana par snetarse el viso. Dopo de snetarse el va nela cuneta dela sorelina de 2 ani e la basa nela fàcia, el pupà el ghe dise de ndar suito e a pian par non desminsiar la sorela.

Dopo dei laori fati i torna rento casa. Intanto la dona colea el late con un strasso vècio ma bianco e neto Giuliana pareciea la tola par la colassion. Bepi gavea brustolà un per de fete de polenta e batate sul fogon.

La colassion zera patate con cafè e late o sinò polenta e late. El formaio zera drio finir e la mama ga domandà par carità che non zera par magnar che la ndea far i magnari par la pàscoa ntela pròssima doménega.

Dopo dela colassion come ancora non piovea el pupà ga dito a tuti che i ndesse in campagna coertar la meda de fasoi prima dela piova e anca spacar un poco de mìlio che sinò el ndea smarsirse.

Come la picinina zera anca ela desminsiada la fameia ze ndata tuta in campagna par far pi svelti el laoro prima dela piova.

I sposi i ze ndati tor foie de palme e bananere par coertar la meda de fasoi, i fradei i ze ndati spacar mìlio e la picinina i ga metesto rento de una sesta de strope con una puatina fata de palia de mìlio e strassi vècii.

Dopo che Bepi e Marieta i ga finio de coertar i fasoi i va giutar i fioi. Finito de spacar 5 bandiere de mìlio Bepi e so fiol i va casa cangar i bo e tor la careta par portar casa el mìlio.

Quando i riva casa i va ntel potrer i tole i bo e torna in colònia ndove la mama zera drio darghe el peto a la bambina che romai gavea fame. Giuliana inamorada la vardea i osei che zolea e la se imaginea anca ela drio zolar par i brassi del moroso, la zera belche con voia de balar, par gràssia la quarèsima zera drio finir. El Toni invesse el volea che rivesse suito sabo par poder far bacan e zugar coi amici, magari el zera anca preocupà parvia dei dispeti che’l gavea fato fra la quarèsima e sicuramente so pare ndea cavar fora le so aleluie.

Zera poco de pi dele diese matina quando i ga rivà casa e ga scominsià scargar el mìlio ntel capanon. Ma no i ga fato ora finir che la piova la ze vegnesta, e vegnesta con tuta voia. Intanto le fémene le ndate rento casa méterghe legna sul fogo par scominsiar far la polenta pupà e fiol i ga finiu el laoro.

Bepi osa la de fora.

- Marieta! No sta mia desmentegar de scaldar àqua parché dopo vao far la dócia, son massa sporco mi.

El so bagno ze stato in una dócia antiga de 20 litri dove gavea bisogno de mescolar àqua freda e calda fin el punto giusto par bagnarse. Saoneta i non gavea, zera el saon fato con le budele de porsei, e con quel anca se snetea i cavei, shampoo zera par le persone de lusso dela cità.

Intanto che Bepi fea la dócia, Toni de tanto magnar patate e late nela colassion, ga vignesto un bruto mal de pansa el ga ndato ntela patente far i so bisogni, ma no prima de ciapar na sbranca de bòtoli ntel capanon.

Dopo del disnar come piovea che Dio mandea i ze ndati laorar ntel capanon. El laoro zera scartossar mìlio, spacar i tochi dele stremità dela panòcia par darghe a le bèstie e la parte del centro se sgranea e se tegnea de conto. Quela zera la semensa par quando rivesse l’època piantar.

Quando ga rivà note romai la piova gavea finiu e ga vignesto anca un bel ciaro de luna. Dopo che non se podea pi vardar in fàcia de tanto scur el pupà ga impissà el feral che con la so luce giala ga sciarì la casa e scaldà le stòrie che ndea note a rento.

Le stòrie le zera tante, stòrie de rider, stòrie de piander e anca stòrie de vegner fora sgrisoloni. Quando el pupà racontea stòrie de braura el se sentia un toso de 20 ani, quando el contea stòrie de fantàsima el ghe fea anca i moti, zera un mistero tanto grande che’l fea, che fin la toseta de 2 ani parea capir, parché la stea in pie nela cuna e volea parlar anca ela.

Dopo de tante stòrie, i e ndati senar, na sena taliana con polenta, fortàia se anca con poco formaio, un toco de una gamba de salame che la mama ga dito cossì.

- Toni va in cantina ciapa quel salame taià. Parché dopo che el ze snisà suito el se ne và!

Marieta ga fato con maestria el bel magnar. El salame zera sol el companàdego, la disea anca.

- Tosi! Magné polenta e snasé el salame saviu?

Ma radici coti gavea na pignatada parché in questa época i scominsia vegner fora che zera na meravéia.

Poareti i zera, ma magnar i gavea parché zera tute cose prodote li in campagna pròprio. Patate, suche, pomodori, seole, cocùmeri, pressémole, peveroni, carne dele bestiolete, ovi, fin el sucro e la bagna i ghe fea. In cità i ndea dale volte sol par comprar sal, fuminanti, creolina e qualche toco de casimira.

Con questo testo go provà de racontar in poche righe come che zera la vita dei contadini in una giornata intiera de laoro, ensegnamenti, e vita. Si vita parché prima dela television, dei telefonini, e de de tanti spotàcii che gavemo incoi in un lontano 1985 zera possìbile viver.