Bianca de Neve - Colonização e Evolução Boa Esperança

 8. Bianca de Neve

Proj Colonização & Evolução Boa Esperança

Vardé che bel laoro par i tosatei

Nte un regno ben distante, la era de star una bela gióvana, una prinsipessa de cavei neri e pel bianca. El so nome era Bianca de Neve e la era de star cola so maregna che, anca ela, la era na dona belíssima, però la era trista che mai, vanitosa e no la amitia che ghe fusse qualche altra dona pi bela che ela.

Tute le matine, la maregna la ndea davanti al spècio ela ghe dimandea:

- Spècio, spècio mio, ghe zelo qualche dona pi bela che mi?

El spècio el ghe respondea sempre:

- Nò, Maestà, ti te sì la pi bela de tute!

Un bel di, la regina la ghe ga fato nantra volta la domanda al spècio e la se ga ciapada desprevenida cola risposta balba:

- Si, Maestà, ghe ze una gióvena pi bela che ti, Bianca de Neve!

La regina la se ga inrabiada e la ga comandà un cassador portar Bianca de Neve via sconta ntel capoeron e finirla fora cola so vita. Rivando ntel capoeron, sto tosato, sensa coraio de far quel che la regina crudele la ghe gavea comandà, el ghe ga ricomandà che la scampesse ben distante e mai pi no la tornesse indrio.

Bianca de Neve la era tanto spaventada ma la ga scoltà el consìlio del cassador e la se la ga tolta svelta de lì, sensa urma. Su el tardi, la ga catà na caseta ntel alto de una Montagna.

Ela no la savea, ma quela casa lì, la era la casa dei sete nani che i stea tuto el di fora, laorando nte una mina. Co i nani i ze rivadi a casa, drio sera, i se ga maraveiai de veder quela toseta a casa sua. Bianca de Neve la ghe ga spiegà cossa gavea sucedesto a ela e i la ga acetada par star insieme lori ntela so caseta.

Dopo de un tempo el spècio e seitava dir che Bianca de Neve la era la pi bela dona del mondo. La regina crudele la se ga convinta che la toseta la saria ancora viva.

La regina la ga ordinà al spècio dieghe ndove la Bianca de Neve la era soconta e la ga rivà saver che la era sconta ntela casa dei sete nani. La regina la se ga trasformada nte uma vecieta e la è ndata portarghe un pomo invelenà.

Co la ga catà la Bianca de Neve, la maregna rugna, fando finta esser uma noneta, la ghe ga dimandà un bicier de àqua e, indrio, la ghe ga dato el pomo bel e saporoso.

Suito che la toseta la ga proà el pomo, la ghe ga vegnesto afano e la è cascada in tera. La regina la è restada contenta, parché la ga pensà che, al fin, la garia finida fora cola bela Bianca de Neve.

Drio serota, tornadi indrio del laoro, i sete nani i ga catà la Bianca de Neve stirada in tera. Spaventadi, i era sicuri de che la saria morta. Alora, i la ga metesta nte un casson de viero e i la ga portada ntel bosco, par che tute le bestiolete le podesse amirarla.

Un bel di, un bel prìnsipe che el girea ntel bosco el ga visto questa bela toseta ntel casson de viero e el se ga impassionà de tanto bela che la era. De tanto incantamento, el ghe ga dato un baso. De colpo, la Bianca de Neve la se ga sveliada, fando fin ala maledission dela regina crudele. De lì avanti, i è restai insieme e contenti.