Pupà de sete fiole - Per Ademar Lizot

Scarica la stòria clicando qua.

Ascolta la stòria clicando soto:

De Sete Fiole e el Pupà

    Baseà ntei ricordi de me fradel, ghe raconto de Inossent Spamezan, un omo de mesa età, de sete fiole pupà. El zera un cristian sémplice come na scorsa voda de mandolini e, parvia de esser picinin, meno de metro e sessanta de altessa, tuti lo ciamea de Inossentin. Nte quel tempo che i òmeni taiea fumo e i preti vestia la batina negra piena de botoni, el zera de star ntela località de Lìnea Bela, paesino sù par i monti dela "Serra Gaúcha" e la so fameia zera una dele tante de orìgine véneta de quela località.  Ai sìnque ani de età, al magnar angurie calde, nte un giorno de istà, el ga pati na bruta stomegal congestion e, de lì In vanti una insipiente balbessa se ga imparonà del suo parlar e completamente balbo el ga diventà. Quando el se fermea par dir na parola, el fea fin pecà.  Ciusea i picinini òcii e struchea i grissi mostàcii, come se i fusse i colpéboli dela so balbessa e, inquieto come un caval vanti dela tempesta, le parole ghe vignea fora de un modo strambo, che ale volte fin i cagni i ghe sbaiea adrio e, anca sempre gavea qualchedun che ghe piasea tirarlo in giro, quando el passea i ghe dissea:

- Inossent, laora tanto e non ciapà gnente.

- Nde a mè, mè, mè merda! El ghe rispondea.

 La so pi granda ambission zera esser pupà de un bambin màschio, parché nte quel  tempo  un maschieto portea grand contentamento al pupà, ma  a Lu ga tocà de contentarse solche con bambine, parché tute le volte che'l domandea al Sior un tosatel ghe vignea na toseta e, cossì de sete fiole el ga diventà pupà. Tute bele e sémplisse contadine, che esibia la soavità de ragasse sicure de so belessa, con un modo sémplice de farse remirar e, che bei nomi che le gavea; Isabela, Agostina e Carmela, Amàbile, Pierina e Adele e la bambina Giovanina.  

  A ogni volta che una nassea, i visini ghe domandea:

 - Alora Inossent, in fine ga rivà el maschieto?

 - Non, non, sol solche me me vi vien ga, ga gaite, so so sora ga ga gaite, el rispondea.

  Un giorno, dopo de tanti ani passadi, son ritornato al paeselo e, al visitar el simitero, in meso al campo santo gavea so tomba e soto dela rùstega crose, ntela làpide zera scrita una frase che sintetisea tuta la so vita.

 “Qua riposa Inosent Spamezani, el caro Inossentin, che ntel trascorer dela vita no`l ga buo la gràssia de esser pupà de un maschieto bambin.  

Ademar lizot.