Nino dela Fisarmonica - Ademar Lizot

sexta-feira, 9 de dezembro de 2022

Par scaricar el àudio, clica qua.

Par ascoltar la stòria, clica soto:

 

Nino dela Fisarmònica


  Tutiquanti lo ciamea de Nino, e el zera el sonador pi pòvero e anca el pi alegro che go cognossesto.  Par rivar a so casa tochea rampegarse su par la stradeta del  monte, e tute le sere se lo sentia a rider, co so sposa, e fioleti. Se qualchedun serchea de scuriosar rento, podea vederli, felice in torno dela tàola e dopo par indormensar el bambin, Nino verdea la gaita e  sonea che zera un piaser. Nte quela ora se savea che fora par strada, sempre gavea quache zovenot e anca qualche vecieto che lo scoltea e in verità el di dopo, qualchedun lo paghea co un bicier de vin o caciassa.

  Nte quei ani i tempi i zera duri, e par guadagnar qualche soldo de bona misura, el sonea la fisarmònica ntele bodeghe e anca qualche festa de ciesa. Ma a le volte i lo paghea sol co`l magnar, ma ancora così el cantea con tanta passion, pròpio de far piaser, e la tegnea longa, anca par de pi de ora e, de pi che el sonea, tutiquanti a rider e cantar, el fea.

  Ntela bodega pi darente dela so casa, a la doménega de sera el sentea nte una carega, in torno de una tàola de vin profumada, e in torno a Lu,  sentea i frequentadori, par bever e cantar e intanto che el sonea zera par tuti na atrassion.  

  Esser felice sensa gnanca un motivo, ze la pi autentica forma de felicità e, pròpio cossì che zera Saturnino Santin, che el se mantegnea  sempre alegro e so fameia se contentea de quelo che i gavea, sensa pensar ntel altro giorno. A le volte su par la tàola i gavea solche polenta, sensa gnente insieme, sol alegria i  gavea par acompagnarla.

   Dopo de un tempo go cambià de paesel e non go pi sentisto parlar del Nino dela fisarmònica ma in verità non go mai desmentegà, del sonador pi felice che go cognossesto, un omo che ga scoliesto la umiltà ntela so vita e la pace ntele so parole. A la veneranda età de 90 ani el ga rivà e, adesso Saturnino e so sposa i ze ntei confini del firmamento. Ntela so umile caseta rampegada su par la stradeta del monte, ga ancora un dei so fioi de star e ntela parede dela stansa, tra meso la imàgine del Sacro Cuor de Gesù e la Santa Madonina, l`é postà la vècia fisarmònica, sicuramente el ricordo pi pressioso de suo vècio pupà.

Ademar Lizot.                


Nenhum comentário:

Postar um comentário

Gostou?Comente aqui e se possível inscreva-se.

Topo