Splendidi Ani Cinquanta : Ademar Lizot

Clica qua par scaricar el àudio.

Par ascoltar la stòria, clica soto:

                             

                                                Splendidi Ani Cinquanta

 

 El mE beato fradel e mE cara sorelina i ga vivesto la so zoventù ntei splendidi ani 50, e al ricordarli ghe rompie el cuor de alegria, parché i ga passà i meio ani dela so vita, quanda gavea de pi rispeto ai sentimenti, fradelansa e semplicità. Le done gavea na manera sémplice de farse reminar, sensa perder la belessa e, i òmeni no i gavea mia na ambission fora de misura ntel cuor. Di d`ancoi, no i ze mia boni de capir come che semo arivadi ai valori de comportamento de adesso. Ma quelo che pi li spaventa ze che i valori morali i ze cascà in desuso. Se te scolta un tosato o tosata de 14, 15 ani, te mete le man in testa, ti te spavente co le parolasse che ghe vien fora par la boca, robe de far el segno dela Santa Crose. Se pol capir che adesso le tanto pi fàcile de i zòvani parderse ntel mondo, de rovinar la so vita, parché la maioransa el mondo li porta via, porta via i boni, i spaurosi e anca i coraiosi. Si, anca lori e tuti quanti che ga vivesto nte quei splendidi ani, i ga buo 14, 15 ani de età, ma in comparassion co i zòvani de adesso, i zera veri bambinoni, sensa gnanca una astùssia, gnoranti dele ciavade dela vita e dela perversità dei òmeni. La vita ghe corea in meso al tempo, no i gavea mia gnente e i pensea de gaver tuto e, sicuramente come quei de adesso, i sentia na vera urgensa de vivere con passion. Le tose in serca del primo moroso e i tosi in serca de fare el primo amore, parché fa parte dela natura dei màs-cii, dimostrar la so mascolinità, so virilità. Però, soratuto in quei ani, i gavea rispeto con le tose, e con so genitori, nò come adesso che prima i ciùcia el miel e dopo i se lamenta che le ave le ze cative. Nte quel tempo el piaser del moroso l`éra tegner la man dela tosa, e dopo de un tempo de inamoro, cambiar un baso, un baso rispetoso, un baso de amicìssia, nò un baso sensual, ma nò come adesso che i resta un bel toco de tempo drio basarse. Anca mi, che go nassesto ntel final de quei bei ani, adesso nò so mia bon de capir, come semo rivadi ai costumi de ancoi, parché anca mi son un omo del tempo antigo, che ga racolto ua nel vignal e ndà à scola a caval, che ga rispeto co le persone, la natura e le bestiolete. Sicuramente non me piase mia la volgarità e gnanca el bacan dela cità, preferisso perder che de una maniera desonesta e crudele guadagnar e, a tanto tempo go capi che in questo mondo de costumi liberadi e consumismo descadenà, no ga pi posto par Mi. 

Ademar Lizot.