Domènega Al Dopo el Mesodi

Clica qua, par scaricar el àudio.

Clica sotopar ascoltar la stòria.

 

Domènega Al Dopo el Mesodi

   A le volte ntel silensio de me ànima, ricordo de un tempo felice dela mia zoventù, quando ntele  doméneghe al dopo el mesodi,  ntela stansa dele case dei amici,  con  le careghe  visine a la parede, par creare spàssio pi grando al centro, gavea le reunion balante e se balava al son dei giradischi, quei de bràssio che basila, che i molea par ària cansione che parlea de simplissità e amor. Dolce melodie, che  fea sbater pi forte el cuor,  e i òcii in serca de sguardar le tose dela stansa, e al trovar quela che fea tremar le gambe e ingropar la gola, alora se ndea in serca de con Ela balar, par dopo cortegiarla, ma con rispeto, con complimenti gentili, sensa vulgarità.

  Al ciaparse  ntele man dela tosa non se parlea gnente, parché la respirassion repressà dificolteva el parlar, ma atenti a ogni nota musicale, a ogni silensio, a ogni frase che fea el cuor  polsar de altra maniera, nte la pi completa sintonia col cuor dela tosa, che al strenderla amorosamente contra el peto, se alsea sù una gradèvole sensassion, una emossion al fior dela pel, in che tuto zera perfeto; el ritmo, el tempo e el equilíbrio. Sensa gnancaun sbàlio, se balea lento, lentíssimo, come che suspensi par sora de nùvole rose, streti e viso a viso, al sfregar del corpo, de soto la fiaca luce , che ancora così la iluminea e scaldea quel  ingènuo amor pena nato. Però ntel s-ciantin che i lavri, pericolamente visini, i zera in fin a punto de baciarse, alora giusto nte quel precioso momento, capitea  la parona dela casa, la mama de chi gavea organisato la festa, par portar la travessa con gasose, cróstoli e sanduisse.

 Alora la luce se fea pi forte e se podea sguardar el viso rosado de tutiquanti, qualche testa moia de sudori, qualche camisa strucada parvia dei fogosi abràssi, questo el senário belìssimo che se rompea ntela stansa.

  Che bote de adrenalina... Quei si che i zera bali, se anca al scurir, la par le 8 ore, tochea de ritornar casa, ma felice, fin l`ària  che se tirea, pi profumada la parea, pi briliante le stele perse ntel cielo infinito, e al butarse zo ntel leto, el parea pi soave.

  Eco,  ga pròpio rason el mio beato fradel quando el dis che i ani pi bei dela vita i ze quei vivesti con certe emossione, quele che se porta par tuta la vita ntel fondo del cuor.

Ademar Lizot.