I Visini de Sti Ani - Ademar Lizot

sábado, 11 de março de 2023

Clica qua par scaricar el àudio.
Par ascoltar la stòria clica soto:


 I Visini de Sti Ani

    Che bel che zera sti ani quando al s-ciarir del di, intanto che un gal cantea e quel'altro rinpondea, con la sinfonia dei oseleti se desmissiea, par scominsiar con speransa nantro giorno de Nostro Signor Gesù Cristo. Par viver in completa fradelansa, soratuto con i visini, che i zera veramente considerati persone dela fameia, con lori se gavea na relassion franca e sinsera,   co`l  sentimento de aiutarse un con altro, ntei momenti de bisogno.  Al visin se podeva tranquilamente domandar par dare na ociada ai bambini che corea e saltea de partuto, sensa paùra de ciaparse soto de una màchina, parché ntele strade gaveva pochi automòbili e chi passea par quele stradete boiente de vita,  zera sempre benvenuto. Al visin, sensa paura se domandea una s-cianta de zùlchero, cafè, sal, in soma tute quele cose che prematuramente vegnea a mancar. Quando el visin bisognea qualche cosa, se gaveva tanto gusto de imprestar, parché tuto questo zera cose normale sti ani, quando tuti se cognossea  e zera un piaser quando se podea ciacolar ntei momenti de pausa del laoro.  Al scurir del di, intanto che le done se reuniva davanti dele case par far qualche artegianato, anca parlar de chi non zera mia presente, alora i bambini ndea a la casa del visin, vardar la television, che tante volte la zera la ùnica del paesel.  Se capitea qualche barufa, i gesti gentili  fea fenir i cativi umori, parché se anca non i zera mia d`acordo, ancora cossì i zera tolerante e dopo con un cambio de bolo, na travessa de gróstoli o qualche altro regalo, tuto ritornea al normale.

Eco, zera pròpio cossì sti ani,  al s-ciarir del di el gal cantea  e intanto che i  oseleti fea la so sinfonia, i visini se saludea con alegria e ntel transcorso del giorno, non i gaveva mia paura o orgòglio de aiutarse, soratuto in caso de urgensa. Di d`ancoi non l'é pi cossì, i visini i ga perso el sentido dela fradelansa, i oseleti i ga volà par i confini del firmamento  e  el gal non fà pi el suo osamento.

Ademar Lizot.


Nenhum comentário:

Postar um comentário

Gostou?Comente aqui e se possível inscreva-se.

Topo