La scola dela mia infànsia - Ademar Lizot

Clica qua par scaricar el àudio.
Par ascoltar la stòria, clica soto:

La scola dela mia infànsia

Autor: Ademar Lizot

Revision: Juvenal Dal Castel e Loremi Loregian-Penkal

La scola dela mia infànsia la zera na ùmile caseta de tole de pin, ma sempre neta, piena de colori e con quel profumo tìpico del zis. Rento dele so parede se assistia le aule col soriso ntei lavri, parché zera scarsa la intoleransa e, stragrando el rispeto col insegnante, che, col equilìbrio e armonia el transmetea el suo saver e, anca, i valori dela vita.

Ntela scola dela mia infànsia, el aluno che ntela stansa dela aula, el fea qualche dispeto, el corea el rìs-cio de ciapar del insegante na regolada, parché, nte quei ani, la passiensa no la zera mia na erba che la cressea in tuti i orti e, quando sto aluno, el rivea ala so casa, cola man segnalada, come i so genitori i zera convinti che el insegnante el gaveva sempre rason, i ghe disea:

— Quela bota lì, la se ciama descantabauchi e, se te la ghè ricevesta, l`è stà parché te la ghè meritada.

Dopo, come punission, ancora ghe tochea star sensa magnar ala sena. Ghera anca quei pròpio diaoleti con problemi de condota, alora, al depì de ciapar na regolada, anca i ghe tochea portarghe ai genitori un bilieto, che i serchea de mostràrghelo solche ala mama, cola speransa, che no la ghe contesse mia al pupà, che, presto el vignea a saver e, alora: Sàlvete tera! Sàlvete mondo!

Però, ai di de ancoi, no l`è pi cossì, parché la maioransa dei aluni e dei soi genitori no i ga pi el capimento che ai insegnanti bisogna tratarli con rispeto. Se un aluno el dise de gaver qualche cosa sbaliada ntela scola, alora, i so genitori i mostra tuta la so delinquensa, al rivoltarse contra el insegnante, come se el so fiol el gavesse sempre rason. Cossì, squasi tuti i giorni se sente dir dela tribulassion dei professori al far el suo brao laoro e che a tanti ghe toca de anticipar la so pension, parché no i ga pi forsa par soportar el assèdio moral e la violensa sensa freno, con insulti e fin la agression fìsica de aluni e genitori, che no i ze mia boni de capir che la società la ze fondamentada nte una strica de règole, che le garantisse el benesser de tuti quanti.

Pensàndoghe ben, par fin che el ingrenaio dela società umana el ze inrusinà o, fursi, spacà e tute quele règole che se gaveva sti ani le ze pestade su e, cossì, semo drio viver bruti, ma bruti tempi, pròpio diversi de quei dela scola dela mia infànsia, ndove i aluni i gaveva na benedia inossénsia e i genitori i gaveva el capimento che soche la educassion la ga el poder de finir fora tuti quei bruti guai dela natura umana e che la gnoransa la ze la note dela ànima, una note sensa stele e sensa Luna.