Clica qua, par ascoltar/sbassar el àudio.
El matrimònio ntel tempo dei nostri noni
Testo de Jaciano Eccher, página 93 del libro Ricordi dei Nostri Noni
In intervista con la sartora Usilia Pelissari, go fato un risgato de come zera le festività del matrimònio sti ani. Vardé cosa raconta sta simpàtica signora.
Tuto scominsiea col smorosar, che el zera tanto difarente dei giorni de incoi. Par scominsiar smorosar, el toso, con rispeto, el gavea bisogno de domandar la man dela fiola par el futuro sòssero. Par smorosar zera bisogno tanto rispeto, caresse e amor vero, no ghe zera la libertà che i zóvani de incoi i ga. I morosi i zera sempre supervisionai par i altri, sia el pupà, la mama o un fradel dela sposeta.
Usilia ricorda ancora che, in quel tempo, le tose le se maridea vèrgine e ga buo anca stòrie de che el fidansà el ghe ga dato indrio la fidansata, par via de che ela non la zera pi pura, d`acordo con la racomandassion de quel tempo. In altri casi, se la fidansata non la fusse pi vèrgine, non la podeva maridarse vestita de bianco, zera solche fata una festa normal, sensa dirito a serimònia e ne a vestito bianco.
Dopo de un tempo smorosando, i scominsiea a parlar in matrimònio e zera in questo momento che la sposeta la scominsiea a pareciar la dota. Ghe zera cose che le zera comprade, ma la parte pi granda la zera fata artegianalmente, come sugapiati, sugamani, ninsioi, tapeti, tovaie, fra altre robe. Tuto zera metesto via nte un baul e, ntela zóbia, due giorni prima del matrimònio, el sposeto el ndea fin ala casa dela fidansata tor la dota. Ntel vendre, un giorno prima dela festa, la sposeta se pareciea, pintea le óngie, petenea i cavei, ansi, tuta la roba che la sposeta la ndea vestir, la zera regalada par el fidansà, parché zera lu che paghea el guasto con la vestimenta dela futura sposa.
El matrimònio se fea sempre ntel sabo de matina, dove el fidansà, insieme coi sàntoli e parenti, el ndea a caval fin ala casa dela fidansata, ndove i fea la colassion, intanto i altri parenti e invitadi i pareciea el magnar par el disnar. Come no i gavea la eletrissità, le bèstie le zera massade ntel di, par far el magnar. Le bevande anca le zera bevue al natural, dele volte se metea dentro de una cassa de àqua, o sorgente, par mantégnerle pi fresche. Dopo dela colassion, ntela casa dela sposeta, tuti i ndea a ciesa, ndove sucedea la serimònia del matrimònio, però tanto la mama dela sposa quanto la mama del sposo no i partissipea dela serimònia. La mama dela fidansata la restea casa piandendo la partensa dela fiola, intanto la mama del fidansà la finia de pareciar la càmera del leto par le nosse.
La serimònia, che generalmente se fea ntela ciesa dela comunità, zera sémplisse. El ornamento el zera tuto fato con prodoti naturai, con fiori del campo o dei giardini. Foie de palme o de altre piante anca fea parte dela ornamentassion, tanto dela ciesa come del posto dela festa.
Parlando in posto dela festa, questa sucedea ntela casa del sposo, ndove ghera el disnar, con carne rostida e lessa e, dele volte, menestra de agnolini. Circa dele 16 ore capitea el merendin, ndove i magnea cose dela colònia, come salame, formaio, cuca, pan, dolsi e, par bever, gavea cafè o vin.
Ala note, la festa ndea avanti e se fea un balo sémplisse, animada par qualche parente che el savea sonar violon o fisarmónica e, dele volte, anca qualche tamburel e fiorida par qualchedun che el savea cantar. Zera in questo momento che i zóvani i vegnea par balar e bever.
Dopo de maridarse, al pi dele volte, i sposi i ndea de star par un tempo ntela casa dei genitori del sposo, fin che i fusse boni de levar su la so pròpia casa. Solche el fiol pi zóvano dei omi el restea insieme dei genitori, par render cura fin che i fusse vivi.
Comentários
Postar um comentário
Gostou?Comente aqui e se possível inscreva-se.