La scola del sècolo scorso - Jaciano Eccher

Clica qua par ascoltar/scaricar el àudio

Clique aqui para a tradução dessa matéria.

Incoi scrivo un testo de nostalgia par quei che ga vivesto e studià ntela seconda metà del sècolo scorso, ma anca informativo e cultural par quei che ricerca o ga curiosità de saver come che funsionava una scola ntel fin del secolo XX. Par far questo, go come base tanto la me esperiénsia come anca i testmònii che go ricevesto fra le interviste fate par i documentàrii del projeto Corbélia e So Radise.

Mi go studià ntela dècada del 1990 nte una pìcola scola de campagna, ndove che no gavea eletricità. Anca se la zera un'epoca relativamente recente, scuasi gnente zera difarente dai raconti che go sentisto dele persone che gavea frequentà scole rurali decènii prima.

La scola ndove che go studià la zera del tipo cognossesto come "Brizoleta". Par quei  che no sa, le Brizolete le zera miliàia de pìcole scole rurali costruide ntel Rio Grande del Sud ntel governo de Leonel Brizola, fra 1959 e 1963. El soranome carino el ze vegnesto dela popolassion in onor al governador, idealisador del progeto, che gavea come lema: "Nissuna creatura sensa scola ntel Rio Grande del Sul".

Ntel me caso, la scola la zera una pìcola caseta fata de cemento composta da una sola sala de lession, una area coerta e una pìcola dispensa che servia anca come cosina. Tuto zera a bastansa sémplice. Ntel total, credo che la costrussion no la rivava gnanca a 60 metri quadradi.

Bagno no ghe zera. Gavea solche una "patente", cossì ciamada un pìcola caseta alsada su de legno doperada par le necessità fisiològiche. Generalmente, queste struture le zera alsade sora una fossa e gavea una tàola con un sércio. Gnanca pensar in àqua ntei cani o discarga.

Ntel caso specìfico dela nostra scola, gnanca fossa ghe zera. La caseta la restea darente a un rieto e i degeti i zera butadi via diretamente ntel'àqua, sensa gnanca una preocupassion ambientale o sanitària, roba abastansa comum par quela època ntele comunità rurali. La patente la ze stà alsada a cerca de 300 metri lontan dela scola, e questo rendea tuto pì difìcile ntei giorni de piova.

Ma tornando a parlar dela scola e del so funsionamento, noantri gaveino sol una maestra. Ela la zera responsàbile par insegnar ai aluni, pareciar el magnar e snetar quel che gavea bisogno.

Fra i magnari servidi ghe zera crema de cicolato, cafè con biscoti e anca piati pì elaborati, come taiadele con "almóndega" o riso con sardela. La me sorela pì vècia la conta che, ntel so tempo, anca ghe zera carne seca, anca mi no l'ho mai magnà ntela scola. 

Oltre de esser maestra,  zera ela che snetea tuto. Ntei giorni de piova, la zera ela che passaea el strasso ntel soaio. Invesse, lavori come spassar la sala, passar sera e pulir el soaio i zera fati par noantri studenti. Ntei ùltimi minuti dela lession, la maestra la riservea un tempo par snetar tuto par el di drio.

La scola no gavea gnanca àqua ntei cani. Par questo, i studenti alternadamente i ndea tor àqua ntela proprietà del visin pì darente, localisà serca de 500 metri dela scola. Ghe zera un posso con manivela ntel giardin. Se lighea le sécie de metal nte'na corda e ne fea ndar in zo fin ntel'àqua. Dopo, bastava girar la manivela par portarli fora pieni.

Normalmente noantri ndéino in dópia. Questa àqua la zera doperada par bever, pareciar i magnari e anca par snetar le man quando se gavea bisogno.

Parlando dele lession, la scoleta la servia aluni de la prima fin ala quarta sèrie, equivalenti incoi del primo fin al quarto ano del Ensegno Fondamental. Due sèrie studiava a la matina e due dopomesdì. Generalmente, la prima e la tersa sèrie frequenta un turno, mentre la seconda e la quarta studiava ntel altro.

Par poder servir due classi al stesso tempo, la maestra la fea la division del quadro negro al meso con una riga. Anca le careghe le zera organizade in bande difarente dela sala. Cossì, i aluni de una sèrie i seguia le atività scrite nte una metà del quadro, mentre quei dela altra sèrie i doperava l'altra metà. La zera una maniera inteligente de insegnar due classi al stesso tempo e al stesso posto.

Parlando adesso dei i materiali scolari, ntel me tempo se doperava romai i quaderni, ma i zera queli de copertina sémplice. I quaderni de copertina dura mi li go cognossesti solo ani dopo, quando che son ndà a studiar ntela cità.

Oltre dei quaderni, noantri doperàvano la pentita o sia, el lapis e boràcia. Ghe zera un modelo de lapis con la tabuada stampada ntel corpo, e quel lì el zera quel che mi de pi piasea. Ghe zera anca un lapis con boràcia intacada. Pena se podea doperar sol dela seconda sèrie in avanti e, anca cossì, solche in certe atività.

Un altro ogeto icònico de quela època la zera la famosa boràcia de due colori. Teoricamente, una dele bande la servia par cancelar la tinta dela pena. Incoi savemo che zera busia dei venditori. Ntela pràtica, difissilmente la funsionava e tante volte la strassinava la carta prima de cancelar qualsiasi roba.

Par copiar le prove e atività, la maestra la doperava un mimeògrafo. El zera un equipamento abastansa comum in quel tempo, che funsionava atraverso de una matris, e se doperea el spirito par trasferir la tinta ntele foie.

Ntela me scola no ghe zera màchina de scriver. Par questo, le matrisse le vegnea romai pronte de casa, squasi sempre scrite a man dela maestra. Ela la zera anca una òtima disegnista. Ntei lavori pì creativi, pareciava figure che dopo le zera reproduside col mimeògrafo par tuti i aluni.

Sùbito dopo la còpia dele atività, tuta la sala la restea piena del profumo caracterìstico del alcol del mimeògrafo. El zera un profumo tanto particular, capace de sveliar ricordi imediati ntei quei che ga vivesto sto tempo.

Paragonando i me ricordi coi diversi testmònii che go ascoltà fra le interviste del progeto Corbélia e So Radise, mi son nicorto che le difarensa le zera poca. Cambiava soratuto ntei materiali doperadi e le costrussion dele scole.

Ntei decénii pressedenti, spessialmente dopo dei ani 1950, tante scole le zera alsade su de legno. Le careghe anca le zera fate de legno rùstego e tante volte comportava fin quatro aluni ntel steso congiunto.

Un'altra curiosità interessante la ze che, ntela prima metà del sècolo XX, tanti aluni gnanca i doperava quaderni. Invesse de questo, scrivea ntele pìcole louse individuali de ardòsia, una spessie de quadro negro portatil. Dopo ogni atività, tuto el zera scancelà par poder doperar ancora la lousa. Come gnente restava registrà, i studenti i dipendea molto de pì dela memorisassion dei cómpiti.

Cossì funsionava una sémplice scola rural dela seconda metà del sècolo passà. Incoi, poca gente la cognosse questa realtà. Però, son sicuro che tanta gente che lesi sto testo, ancora i se ricorda del profumo del material scolar, dele amicìssie fate ntela infànsia, dela maestra che ga marcà la so vita o anca de quel primo amor nassesto ntei banchi dela scola.