La Rivalità dei Veci - Per Ademar Lizot

quinta-feira, 20 de abril de 2017

Nostro fradel Ventura, ze el piú vècio dea nostra faméia, così el ga stòrie rento dea so scàtola dei ricordi e ghe piase contarle, soratuto quele dea colònia, alora le parole ghe vien del cor e quando scomìnsia a parlar, anca i picinini i resta sú co le rece par scoltarlo. Questa storieta che scrivo ancoi, el ga parla nte un giorno che piovea e fredo che mai. Ntea so casa quando l`é fredo, ì va tuti ntea cosina in torno del fogon a legna, co`l pignaton de brodo par í bambini e vin rosso par noantri. Alora el ga conta che ntei ani quaranta del sècolo trascorso el zera picoleto, gavea diesi ani de eta e darente nostra casa ntea colònia se gavea pochi visin e í due piú darente dea nostra casa l`era í veci Lino Tiecher e nostro zio Domenico, cognome Minguin í due co depi de setanta ani de eta. Questi due veci í gavea na rivalità, í parea fin due tosatei de scarso giudìssio, ntea so testa i gavea stòrie de cinquanta ani vanti. El vècio Lino l`era de orìgene Tirolesa quei dei mostaci rossi, catòlico, apostòlico, romano fin soto aqua, calmo e alegro, fin che no l fusse inrabià, parché dopo che`l se inrabieva par una o par nantra, mèio starghe distante e no dirghe gnente. Ghe piasea discorer dea stòria del Imperatore Austriaco Francesco Giuseppe e so sposa la Imperatrisse Sissi, la Regina piu bela dea Europa, dopo el se stimea che`l pòpolo Tiroles fea la manifestassion dei sentimenti par meso dea mùsica, la mùsica piu bela del mondo.

Nostro zio Minguin, talianaso cento par cento, persona sincera e onesta, epure cativo, quando se inrabiea gavea un bruto vìssio de bestemar, molea fora na na fila de porchi, in quei momenti, la so dona, na santa dona, che no la podea sentir na bestema, lo riprendea, la ghe disea:..- Te ga fato del mal el Signor, par dirghe quele parolasse? Svergógnete! Alora lu se scusava disèndoghe che no l volea ofender el Signor. Catòlico, apostòlico, tuti giorni al meso di, quando el campanel dea cesa sonea el mesdi, el cavea el capel par el segno dea crose. El gavea so paladino, l`era el bravo Giuseppe Garibaldi, vensitor dea guera par la liberassion d`Itàlia dei Austriachi. El zio dopo de due o tre bicieri de vin, el parlea che`l so nono gavea fato la guera insieme dea trupa de Garibaldi, í “camisa rosso”. El se stimea che so nono gavea combatesto e infrontà í Tirolesi-Austriachi , che í ga perso la guera e anca la bandiera.

Così gnanca farse maravéia dea rivalità dei due veci. Magari í se volea anca ben, parché í ghe piasea zugar le carte insieme. Così tuti la in torno í tirea in giro, parvia che í fea pròpio da rider. Nostro pupà ghe piasea anca tirarli in giro, par rider dopo, alora un sabo vanti sera quando el sol l`era a tramonto, el ga pasà darente dea casa del vècio Tiroles, el se ga scondesto dadrio de na pianta e dopo sensa nissun vederlo, el ga fato un osamento così strodoso che`l ga ribonbà par í monti, el ga dito:...”-Come farali vivere questi Tirolesi sensa bandiera, í ze stesso de na trupa de mui sensa paroni”. El vècio Lino, dopo de scoltar questo spropòsito, el ga salta fora dea casa rabioso come un can, el ga fin perso el capel e la pipa, però no´l ga visto nissuno, alora co í oci pieni de tempesta el ga fato un osamento;...”-Fame el nome, per carità, fame el nome spussolento d`un pien de rogna, vien qua se te si bon! Vui ciaparte per la coa e spacarte le gambe! “ Ma el pupà la fermo sconto dadrio dea pianta che`l se tegnea par nó rider.

A la domenega dopo mesdì, nostro pupà se ga incontrà co`l vècio Lino ntea bodega del zio Biasi. Alora el ga domanda cosa ga sucedesto, parché el gavea í oci Rossi e la fàcia de stanco. “ -Toni, bisogna che te sapie che í me ga fato un dispeto geri sera, così nó go gnanca riposa, go salta la note intiera, ma se lo ciapo quelo matussel voi consarlo a bastonade e dopo voi sentarlo te un gnaro de formighe rabiose”.

Ma ciò Lino, che ora che`i te ga fato quela malagràssia geri sera?

-La par le Oto

-Òstregha!..A quela ora el zio Minguin ga pasà davanti to casa e dopo el ga vignesto a me casa bever un bicier de vin.

-Porco can, alora l`e stato lú! Ma se lo ciapo!

El gavea pena fini de parla, quando capita rento el zio Minguin, sensa saver gniente, vanti saludarli, el vècio Tiecher lo ga varda con oci de cativo e el ga bravià diséndoghe:..

- Minguin, cosa gheto dito gieri sera?

El zio lo ga vardà, sensa capir gnente, el ga pensà...- L`é strambo che`l vècio li? Dopo ghe ga vignesto sú í nervi e el ga parlà...- Quelo che go dito, go dito, porcocan!

- Varda Minguin che le ani che la go sú con te, ma questa te la me paghe.

Í due veci í zera ancora persone de forsa e de sùbito el vècio Lino ga salta sú dea carega e fato un gesto par darghe un slavation ntea fàcia del zio, alora in quel s-ciantin nostro pupà che`l zera sgoelto e omo de forsa ntei brassi, lo ga tegnesto diséndoghe;...

- Ste calmi i due, siete voi cristiani?

- Sì semo cristiani, co la gràssia de Dio, ga rispondesto insieme í due veci.

Alora piampianeto í se ga calma, el pel se ga sbassà zo e le fumane le se ga s-ciarà.

Eco! dise el vècio Tiecher; - Scuseme Minguin, ma bisogna che te sàpie che i me ga fato un dispeto geri sera e me go sbalià con te. Adesso femo la pace, parvia che noantri semo cristiani fioi de Abel e nó de Cain.

Dopo í se ga saludà e insieme de nostro pupà í ga scominsià a zugar le carte e in che`l sabo dopo mesdì ntea bodega del zio Biagi, ga ritorna la pace e amabilità.

Ademar R. lizot
Stòrie come queste ze qua nel sito Brasil Talian, scrive una anca ti!!!

Nenhum comentário:

Postar um comentário

Gostou?Comente aqui e se possível inscreva-se.

Topo