Italiani del`Est dela Provinsìa de Santa Catarina - Ademar Lizot

Pochi mesi fà che so vignesto de star nte una cità del litoral dela bela Santa Catarina, alora me ga vignesto la curiosità de rissercar sora la stòria dei primi imigranti veneti rivadi ntea Provìnsia de Santa Catarina. Quei del ovest í ze vignesti dela Provìnsia de San Piero, ntel scomìnsio del sècolo passà, i ga passa el fiume Pelotas e el fiume Uruguai e dopo i ga colonisà quele bele tere del ovest, penso mi che questa bela stòria, tutiquanti ga cognossensa. Tutavia la stòria dei primi imigranti taliani che ga partissipà la colonisassion del`Est e del nordest de Santa Catarina, l`é ancora una coriossità.

Í primi registri de imigranti Italiani del`Est e litoral de Santa Catarina, i ze del ano de 1836, quando che gaveva la guera dei “farapi” ntel sul del Brasil, ntel tempo che l`é stata proclamà la “Repùblica Juliana” ntea cità de Laguna e in quela lota una mùcia de italiani ga participà ntea trupa dei rebeldi “Farapi.” Tutavia la granda imigrassion Italiana ntea Provìnsia de Santa Catarina ga scominsià ntel ano de 1875, ntea località de “Rio dos Cedros”, dopo Nova Trento, Brusque e anca insieme dei tedesci in Blumenau. Í zera vignesti in so maioransa dele provìnsie venete del norte d`Itália:.. Verona, Treviso, Vicensa, Padova, Trento, Rovigo, Venezia, Belluno e Ùdine. Dopo ntel ano de 1877, ga rivà na mùcia de faméie al litoral sul e quela brava gente ntel ano de 1878, í ga alsà su la cità de Urussanga e dopo la cità de Criciúma e in 1891 la cità de Nova Veneza, la prima colonisassion organisada con stradete e case meteste a posto par la compagnia “Metropolitana.”

Quei imigranti che rivea al norte dela provìnsia, í disbarchea ntel porto de Itajai e anca nel porto dela cità de Desterro, che dopo de 1896 ga cambià el nome par Florianópolis, in omenàio al presidente del Brasil Floriano Peixoto. Quei del sud í disbarchea ntel porto de Laguna, la cità dela bela e coraiosa Anita, la eroina de Brasil e Itália e sposa del bravíssimo Giuseppe Garibaldi. Dopo del porto par el fiume “Tubarão, le faméie dei imigranti scominsiea el viàio par cumpir so destin in meso al mato, pien de bèstie de ferossità.

Dopo ntel trascorso dei ani i imigranti del litoral, no i ze ndadi verso l`ovest dela Provìnsia par far la colonisassion, cossì i ze restai par tanto tempo darente le spiàie, parvia dela granda montagneria, la “Serra do Mar”, montagne alte, difissile d`oltrapassar. Cossì in quei tempi i ostàcoli dea natura i ze stadi tanti che no dea gnanca par rampegarse su par i perai de sassoni. Solamente ntei ani 40 del sècolo passà che qualchedun ga oltrapassà el pian dela serra, ntea cità de Lages, Curitibanos e altre tante.

Cossì, un pochetin dela stòria dea nostra gente ntel litoral de Santa Catarina, stòria bela de chi ga fato del ogetivo dela vita, la faméia, el laoro e la credensa in Dio.

Ademar Lizot.