Pagine

Clique para entrar

domingo, 19 de fevereiro de 2017

La cità granda me fà piànder - Por Ademar Lizot

La cità granda me fà paùra e anca piànder, l`é piena de gente chi va e chi vien de partuti í cantoni, persone a passo svelto, le par formighe ligere e povereti nói riva a parte nissuna, me vien fin na làcrima ntei óci e un dolor ntel cour de vardarli, co so selular, nissuni se saluda e tutiquanti co í óci pieni de malinconia e rabiosi, serali mati, o il mondo adesso l`é rebaltà a gambe í sù? O saralo el fine del mondo? Brute robe quando se bisogna travessar na strada, alora... “Santantoni auiteme”, bisogna star su co le réchie, parche ghe né tanti auti e camignoni, che noi te assa mea travessar in pace, noi rispeta gnanca la fassa de securessa e par disgràssia í mola fora na fumana spussolenta che fà schifo. Soratuto, ntea cità, mai fidarse de nissuni, bisogna verder í óci e no dassarse imbroiar, parche se te se baúco, í te ciava via tuti í soldi, í te assa sol de budande. La mancansa de rispeto ze la cosa più fàcile de catarla fora. Farali come vivere questi cristiani in questo mondo in rabalton, pien de invídia, gnoransa e falsità, scarso de sentimenti e soratuto a lontan dei insegnamenti de nostro Signor Gesù, che lera perfeto, el ga fato tuto de bon, ma i lo ga impicà su na crose.

Pensandoghe sora, gávea própio rason el mio pupà Toni, quando parlea che mila olte andar ntea rossa sapar, che ntea cità a spàsio, parche con tuta quela confusion dea cità, la so testa boiea compagno de un pignaton de brodo. Cristiani stesso de lú che gávea el caráter fato ntea fratelanza e simplissità, nó podea mai costumarse a viver ntea cità. Par lù, la cosa piú importante dea vita zera la faméia, l`amicíssia, el volerse ben, el giutarse un col`altro.

Fortunàti ze í contadini, Che`l Signor ghe ga dato la gràssia de vivere ntea colònia, insieme dea natura e de le béstie, creature de Dio. Cosi bisogna rispeto co la natura e amabilità co le bestiolete, parche le gà la so ànima e ghe sicuro che la ze piú límpida e pura che l`anima de tanti omeni, quei rabiosi, sensa amabilità e sensa Dio e che í ghe piase solamente í soldi. Quando zera picoleto, í me genitore me gà insegná che bisogna amabilità e rispeto co le bestiolete, che le ze creature del Signor e salve del dilùvio par Noè.

Adesso che son anca mi avanti co la stassion, son vignesto de star ntea cità, in serca de na ilussion, cossi son quà par compir mio destin e anca parvia che el Signor comanda nostro destin, magari se gavesse imaginà a sto posto nó saria. Tutavia ghe sicuro che m`anima la ze de contadin e mio cuor sbàte forte par l`simplissità, l`dolcessa e l`umiltà e ntea me testa ghe sempre í dolci ricordi dea colônia, dea casa dei noni, granda e maestosa, sempre co le porte vérte, par vegner rento l`aria fresca, co ´l vignal e el giardino pien de fiori, le bote piene de vin e le bachete piene de salan e osacol e anca el méio formaio del mondo. La anca se piàdea, ma pi de tuto se ridea, parvia che se gávea sempre na gran speransa nel cour.

Ademar R. Lizot

Nenhum comentário:

Postar um comentário

Gostou?Comente aqui e se possível inscreva-se.