Un "Spassacamin" nela mia cità - Stòria verídica par rider

La stòria che ve conto adesso la ze pròprio verìdica e la fà ridordar dela canson "Lo spassacamin".
Prima ve conto che quando mi, me fradel e miei cosini èrino bambini, noantri non lo gavea un angelo ogniuno e si sinquanta par èssere boni de darghe fora conta de tosati tan periculosi e sensa giudìssio.
I fioi dei vissini i gavea i careti par ndar de riva in zo pa'i potreri ma come noantri non semo stati boni e gnanca gavea passiensia da far bei careti anca noantri gavemo smontà la careta del pupà. Gavemo cavà fora le tole, el "cabeçalho"(non son bon de dir in talian come se ciama) e dopo co'i pie se guidea urtando de una banda a l'altra la "zorra" de questa careta vècia.
Magari come la careta la gavea i fèrii ntele rode la ghe dea massa salti e suito gavemo spacada fora, ma nantro di ve conto una stòria che ga sucesso con la careta parché incoi la stòria ze nantra. Ndemo a la stòria.
In quei ani se podea taiar via le piante sensa problema con le lege e el goerno, el pupà prima sensa vóia ma dopo li ga convinto a far el ga messo su meso di par rabaltar in tera una pianta cossì grande de nome "Canjerana" che la ghe da bele tole de color rossa.
Questa pianta (un pecà gaver taiada penso incoi) la zera tanto grossa che sensa busia gavea bisogno de al meno 3 òmeni par poder abraciarla e el so tronco el zera cavo(oco) in meso, e questo cavo ndea anca in zo circa de due metri de fundesa.
Dopo che ga passà un per de ani nantri con la curiosità de saver cosa gavea in fondo, nela imaginassion da bambini forsi gavea anca un tesoro nascosto gavemo deciso de esplorare. Prima gavemo tacà fogo par copar possìbile bisse, ragni e altri bestiolete, ma el fogo el se ga tacà brusar una stimana intiera facendo una fumana la in meso al bosco la su par quela squasi montagna che el me pupà pien de paura credea che fusse i straterestri drio far speriense el se ga mai incoraià de ndar veder la orìgine del fogo.
Ma passà un per de di dopo che el fogo el se gavea fermà semo ndati tuti, mi, me fradel, miei cusini, e anca le cusine venute de un'altra cità, motivo questo che noantri par se far veder bravi tosati coragiosi gavemo sceliesto questo giorno par la splorassion.
Al rivar nel buso negro de carbon che ga vansà de quela pòvera pianta gavemo ligà una corda nel fianco del me fradel Giovani che l'era el pi magro e lo femo ndar in zo par quel buso negro sconossuo con un ciareto fato con una latina de òlio e una candela. Passà un minuto dopo che el zera in fondo el ghe osa par noantri tirarlo su.
Quando el vien fora el vien negro, negro che "someiava tuto a lo spassacamin" e de tesoro non gavemo catà niente. Magari gavemo ciapà si, ma gevemo ciapà tante scuriade dopo dela mama che ghin tochea snetar quele robe sporche.