Pagine

Clique para entrar

RÁDIO AMICI DEL TALIAN NO AR

sábado, 25 de agosto de 2018

LA STÒRIA DEL CAN CIUCHETON- Roberto Arroque

“- Far un malan pròpio fora de mesura de quele maniere là, ghen’ò visto poche
volte...” - El scomissiava contarla Gigion De Cesaro. “- Onorato, fiol de Caravàio, romai un
tosato in ora de ndar a soldà, el ga bio la stùpida idea de inciuchir el Bìbi, un can lebrero
grando, sbiancuso. Sto can, magari, el ga refudà el vin che Onorato el ghe gà metesto in te una
scudela. Ma dopo de Onorato proar arcoante misture de vin con pan e altre robe, el can el ga
tacà piaser el gusto. E el Bìbi el se ga tornà un grande apressiador de vin! E tacà beverghene sempre de più. E far ciuche sempre pi grande...

“Lora Onorato, el toso sfacià, gia che vin i ghen fea sempre de vanso, nol assava mai el
can sensa bever: lu el impieniva una mastela fin metà de vin e la postava andove chel Bìbi el
dormiva.
“La mastela la se svodava pi in prèssia drio man che'l can el deventava sempre pi
ciucheton. Onorato el se la godeva a rider con le paiassade del poro bèstia ciuco par completo.
“Ma un giorno Caravàio, so pupà de Onorato, el ze vegnesto a saverlo. E el gà
proibisto el fiol de darghe ancora vin al can.

“Lora si la ze vegnesta bruta! Parche el Bìbi romai el zera invissià del tuto. E a star due
giorni sensa vin el pareva de ver deventà mato! Infine Caravàio el ghe ga dito a so fiol:

- Adesso che romai te ghe fato el mal, tégnetelo. De qua avanti te si incargà ti de mai assarghe mancar vin al Bibi. Parche lu, poarìn, romai el ze come el poro nono, che ghe bateva el
atache de tremarola quando che se lo assava mesa giornada sensa vin.’

“Onorato, più par dispeto de che par obediensa, nol ghe ga mai assà mancar
abondànsie de vin al Bìbi che, poro bèstia, el fea fiaschi sempre pi grandi. Romai i visigni, che
i saveva dela stòria, i vegneva far visite in casa de Caravàio sol par veder le paiassade del can.

“Ma ghe ze rivà el giorno de Onorato ndar via a soldà, in un quartel in un posto
distante. E Caravàio e i altri fioi tante volte i se desmentegava de darghe vin al Bìbi. Sto can,
lora, el scampava in volta, via par le case dei visigni, medigo che in cierca de Onorato parché el
ghe desse vin. I visigni, vedendo el can rivar tuto tremando, i ghe dava anca lori una masteleta
piena, parché vin tuti i ghen fea tanto. El can, con cuela, el gà imparà a ndar in volta n'tele
case, e de par tuto el zera recevesto con la so bela misura de vin.

“Vol dir chel Bìbi el se ga costumà anca lu come i òmini ciuchetoni, che i fà i ‘capitei’,
passando de bodega in bodega: lu el passava de visigno in visigno par spetar la so mastela de
vin. Quando che uno el se stufava de darghe de bever, sempre ghen’era nantro che lo
sustentava. El can dopo el dormiva, ciuco, butà in tera come morto! Fin che la ghe passava via
e el se partiva par ndar far nantro capitel, vol dir nantra ciuca in casa de nantro visigno.
 De note Caravàio el ghe dava de magnar al can e lora zo nantra masteleta de vin!
“De rabalton in rabalton el Bìbi el zera sempre tuto spelà. El se impieniva de feride e
ghe mancava un toco de rècia par via de le lote co'i altri can, parché nele lote lu
sempre le ciapava.
“Fin che una matina el can nol ze mia aparessesto. Caravàio lo ga ciamà arcoante
volte, ma gnente de Bìbi.
“Ma ze mèio che contemo sùito la fin de la stória”
El concluiva Gigion De Cesaro. “
L’era el tempo de la ùa. E el poro can, parquel che se gà calculà, el ze deventà mato de vóia

Quando che'l ga recognossesto el odor del vin pena fato, che vegneva dei graspi drio fermentar
in tel tinasso. E anca sel Bìbi el zera romai tuto sgherlo, el ga catà una maniera de rampegar fin
sora la tina par bever el vin novo. Nissuni ga visto come che'l ga fato. Ma quando che
Caravàio, a la matina drio, el ze rivà in cantina par vardar come che'l ndava el vin, el gà
visto che'l can el zera la dentro negà! E che la ùnica cosa che adesso ghe zera ancora de far
l’era trar zo pal rio i graspi, el vin, el Bìbi e anca el tinasso...”


Nenhum comentário:

Postar um comentário

Gostou?Comente aqui e se possível inscreva-se.