Pagine

Clique para entrar

RÁDIO AMICI DEL TALIAN NO AR

quarta-feira, 20 de março de 2019

EL formàio Stagionà - Roberto Arroque

Me nona Virginia la gaveva sempre de dir che'l formàio de gratar che se doperava a
casa nostra no'l zera più come quel de una volta. Quel de adesso no'l saveva pi de gnente.
“- Costumadi che si, romai, con quei pòcii de formàii del di de ancoi, se ve meto in
te la menestra farina de mandioca come se la fusse formàio gratà valtri gnanca no ve
inacorzé. La provocava ela.

La gà risolvesto mandar far, de una freghesa, un toco de formàio pròpio de so
idèa, pareciada giusto de la maniera come che la voleva ela. E dopo de passada in tel vin e
in tel aseo, ela la gà metesta in cantina par stagionarse. Ma ben sconta, ntela parte più
alta de la scansìa.
Dopo de un poco de tempo, romai tuti i se gaveva desmentegadi che ghe zera sta
pessa. Meno che la nona. Parché ela la controlava el tempo che ghe volarìa pal formàio
maserirse contando i giorni in quel marcadi de Santo Antònio che la gaveva de drio la
porta dela càmera da leto.
Dopo de arcoanti mesi la gà considerà che, se'l gavesse vóia de masrirse, el
formàio romai el gaveva bio tempo che basta. E una doménega de matina la gà resolvesto
far i tortei par le visite che ghe zera capità a casa nostra.
“--El me formàio el sarà là che'l dise ‘màgneme’! La ghe gà dito a so fiol Gioàn, me pare,  ridendo de tuta boca.
“- Lora, Gioan, vien con mi zo in cantina che ti te me lo tiri zo de la scansìa”.
Quando che me pare el gà visto la pessa, ghe gà tocà dar-he tuta la rason a so mare.
El formàio el pareva pròpio che'l disesse ‘màgneme!’. Ma, quando che'l ze ndato móverlo
par tirarlo via, un pìcolo urtoneto sensa voler lo gà rabaltà zo dela scànsìa. El formàio el
ze ndato rolando via pal piso de sasso de la cantina, e l'é stà una vita par compagnarlo. El
gà batesto ntela parede e el ze tornà indrio, vegnendo fermarse ai piè de la nona.
Quando che la pessa la se gà fermada de rotondar, la nona la se gà sabassada e stirà i
brassi par torlo su con le due man.
“- Ma Signor! La gà sclamà, con la pessa in man che pareva che la gavesse
ancora voia de scapar, e sto colpo zolando par’ària. La formàia la ze liviana come una
piuma! Mi no ghen’ò mai visto de liviane cossita...”
El mistèrio el se gà sùbito s-ciarìo: nte un cantoneto de la bela pessa de formaio de
la nona dava par veder un buseto. Ma pròpio un busetin, che ghe passava sol un dèo... Un
sorzo –un pìcolo ratìn-- el ghe gaveva piasesto anca lu el formàio! E come che no'l zera mia
bon de pareciar i tortèi, no'l ze gnanca ndato drio de spetar che'l formàio el se stagionasse.
Sto sorzo el gaveva bio nantra idèa: el gà fato un tùnel in te la pessa, ndato de star rento el
formàio, e là el ze stato chi sà quanti giorni sol magnando. Fin chel gà assà là solche la
parte più seca de la scorsa. Una pelìcola finìssima! Veramente un òpera de arte, una tonda
scultura!
Al mesogiorno, magnando i tortèi –nantra volta con un formàio de Quei che ‘se
podarìa confònder con farina de madioca’-- me pupà el gà fato solche un comentàrio drio la
nona. Un comentarieto pròpio pìcolo, par no ver de parlar cose che serti i le considerarìa s-
chifose dite a la ora de magnar:
“--Te gavevi rason, mama, che'l formaio romai el zera drio dir ‘màgneme’. Seguro
che'l sclamava pròpio così. Ma lu el parlava forte, e ghe ze stà uno che'l gà acietàla
sogestion prima de noantri...”

Nenhum comentário:

Postar um comentário

Gostou?Comente aqui e se possível inscreva-se.

txt

google.com, pub-2838464224155337, DIRECT, f08c47fec0942fa0