El Vècio ntea Piassa - Ademar Lizot

quinta-feira, 30 de maio de 2019

Ascoltemo el Lizot:
                                         El Vècio ntea Piassa
      Altro giormo go ritorna al mio paeselo de nassità e ntel momento che traspassea la frontiera, go sentisto n`arieta che sufia gradèvole e che porteva insieme na repentina umidità co`l profumo dela erba bagnada de na pioveta d`un giorno vanti. Alora go visto che ntel cielo le nùvole corea sensa prèssia, intanto che nte mio peto el cuor batea svelto   parvia dela emossion e  nte quel s-ciantin me ga vignesto in mente che questo ano a lontan, ga passà co la sveltessa   d`un caval che trota, par nò rivar tardi.  
   Dopo quando son riva a la cità dele stradete che me portea sempre al medèsimo posto, cità che go alsa su la mia vita, alora go ricorda de tanti  momenti vivesti, alegrie e anca despiaseri.  Nte quel giorno, intanto che caminea par la piassa dela cità, go visto na mùcia de tossi co`l vardar orgòlioso, che gnanca al mio  saludo de bon giorno nò i ga buto la dignità de risponder, parvia che cossì ze la bruta realità de di d`ancoi. Dopo pi avanti go trova sentà nte una bancheta, un vècio de fassoleto rosso nel col,  penso mi che`l gaveva in torno de otanta ani de eta,  co`l viso pien de rughe, de capel strassinà e sbusà che no`l val un scheo sbuso, le bombàcie anca quele rovinade e taconade e ntei piè, gavea sinele de corame rùsteghe. Però quando go mirà nte so òcii,  insieme du`n sguardo malincòlico, go visto anca el fulgor dela dignità.  Alora con rispeto go cava mio capel dela testa e lo go saludà, come gaveva saluda a quei tossi de vardar orgòlioso, però  soratuto  go saluda parche tuti í nostri vècii i ze gente degna e i se mèrita tuto el rispeto.  Alora el vècio l`é  resta  fermo e par un àtimo no`l ga dito gnente, pareva  fin che  un spavento el ghe ga ingropà la gola, che gnanca parlar no l`é stà bon.  Dopo pimpianeto  el se ga alsa sù, co la fadiga de chi porta  su par l`é  spale la stufada de otanta inverni, insieme de na stampa de chi el tempo gaveva vinto, peró sensa sbassarse ntea derotà, e cossì co la rustissità d`un contadin, insieme dela elegansa d`un vero fidalgo,  el me ga stendesto la man piena de calossità,  nun saludo de rispeto e nte quel momento che go ciapà ntea so man me ga vignesto la sensassion che zera drio saludar la pròpia Provìnsia de San Piero del Fiume Grando del Sud, che di d`ancoi camina meso strassinada soto la evolussion.
  Quel giorno, quando la note vignea zo co la suavità d`un caro ricordo e la luna ostentea la frieza d`un cristal murano go ritorna mio pensiero a quel vècio sentà ntea bacheta dela piassa, drio veder el tempo passar co la suavità d`un caval che trota sensa prèssia de rivar. Í so òcii intanto quel vardea el movimento, anca í parlea de qualunque ricordo dela so infansa, qualunque epopea dela so vita o fursi el fusse gnancora drio viver l`utopia dela gioventù come se  no`l se gavese gnancora desmissià de un sogno belo.    
 Ademar Lizot.

Nenhum comentário:

Postar um comentário

Gostou?Comente aqui e se possível inscreva-se.

Topo