Tereza. Là ben darente ghe zera de star anca due so sorele, maridade con due fradei de la
faméia Bertinatto: la Constantina la zera maridada con Emílio e la Stella con Dante.
Andrea Tosi el se gà crià al sistema antigo de quela region, andove che se catava
gran natural fàrghene qualcheduna ai amighi e anca ai parenti par dopo rider tuti
insieme. E in meso le vìtime favorite dei so dispeti ghe zera anca le so due sorele.
Un giorno sti due cugnadi visigni i ze ndati a una sposission de bèstie. I gà comprà
due vachete, una manseta ogni un. Le zera manse de la medèsima rassa, del medèsimo color
e de statura compagna. E le ze vegneste de late insieme. L’è stà quando che Andrea e un so
compagnero de dispeti i se gà pensadi de fàrghene una pròpio de bela ai compradori de le
vachete vol dir, a le due sorele e ai cugnadi.
Una note sensa luna lu e sto so compagno i ze ndati ntela stala de la
Constantina. I gà molà la vaca e dopo i la gà tirada par una corda fin la stala de quel’altra
sorela de Andrea, la Stella.. Là i la gà trucada par quel’altra bovina che i la gà menada par
la corda fin la stala andove che i gaveva tirà via la prima bèstia. Vol dir che i gà metesto le
bovine una ntela stala de quel’altra.
Valtre savì che una vaca la recognosse sempre chi che và mónzerla. Ela la se
costuma con sta persona e no la acieta che più nissuni ghe meta le man su par le tete.
Quando che le parone le ze rivade ogni una ntela so stala par monzer ben
bonora, ancora scuro, una matina de inverno no le se gà mia inacorte che le vache che le
zera squasi compagne le zera state trucade. Ma le vache si che, ogni una, le se gà inacorte
de la diferensa: Quela no la zera mia la parona che sempre vegneva monzer-la!
Lora ntele due stale visigne ghe ze scomissià un festival de salti e peade de vache,
de parone cative e de secie rabaltadi. Un tedèo!
“--Gheto chè, ancoi, che no te ghè mais fato cossita?” –le zera le parole de le
bravade in alta oze in tute due le stale.
Ma eco che, ntela stala de la Constantina, ghe ze capità Andrea Tosi! El se
mostrava gran sorpreso col spetàcolo che'l presensava: so sorela tuta bagnada de late, la secia trato nte un canton e la vaca furiosa che la molava peade par’ària...
“- Gò scoltà l’osamento” – El ghe gà dito lu a la sorela—“E son coresto quà a veder
se te gavevi bisogno de qualche agiuto. E vedo che'l te ocore del bon... La ze una sorte
che mi son brao de segnar una vaca quando che la fà la matussela. Asse-me che la tiro, mi
mi sol, fin là via in meso i ocaliti, che lora fao la preghiera a la me sistema. E ti... ti te stè
quà a spetar...”— El gà brontolà Andrea.
La Constantina la gà acietà la idea, ancora che no la gavesse mai savesto che so
fradel el fusse bon de segnar qualunche sorte de bèstia o de persona.
Natural che la bovina la ze restada là ligada nte una pianta, intanto che Andrea el
ndava sgoelto a la stala de la Stella a contar la medesma stòria e menar via anca la sua
vaca, tirada par la corda. Dopo, in meso i ocaliti, el gà sol bio el laoro de destrucar le
mansete e portar cada una de lore de ritorno a la so stala original. E, là, assar le so sorele far
la prova del monzer, che la ze ndata gran ben in tute due le stale, adesso che le vache le se
vedeva devanti le so parone giuste...
Ciaro ze che Andrea nol gà mia segnà le vache par gnente: el gà fato in truco de un
bel pranzo che'l ze stato fato a la sera drio, in casa de so sorela Stella e sò cugnà Dante.
Ma... e par cosa saràlo stà che Andrea nol gà mia convidà el compagnero de dispeti par
ndar senar insieme? Ben... In verità sto so compagnero el ghe zera, si, in tel pranzo. Parchè
el zera el pròpio so cugnà Emílio, maridà con la Constantina. Lu che'l ghe gaveva giutà a
Andrea trucar le vache...
Sedesti in tola, Dante so cugnà el ghe gà domandà a Andrea che'l ghe insegnasse
segnar le vache pal caso de lore far ancora le matussele. Ma lu el ghe gà spiegà che la so
segnada la gaveva la garantìa par tuta la vita de la vaca. Andrea el gà dito quele parole
sensa assar là de magnar el rostìo e fando finta no badar el vardar desconfià del cugnà, che'l
gaveva un pìcolo sospeto de che’l zera stato fato de paiasso...
Nenhum comentário:
Postar um comentário
Gostou?Comente aqui e se possível inscreva-se.