Sti Ani in Colonia -Ademar Lizot

terça-feira, 1 de setembro de 2020

Ascolta la stòria strucando soto:

 
                                                                          

 

                                                     Sti Ani in Colonia

 

     “I mei genitori sempre i disea che i giorni più bei dela so vita, i gavea vivesto ntela campagna, insieme dela natura e dele bestiolete e, questa afirmassion me fà ricordar dela mama quando la disea:

“-Varda che bela note colma de stele, co la luna che camina in cressente, diman ga da essere una bela giornada de sol e, de matina bonora co`i primi ragii  ndemo arar i campi  e  semenar la tera.

   Alora al s-ciarir del di, co`l primo canto del gal el pupà desmisiea fora tutiquanti...

   “- Ndemo tossi, su del leto, che questa no l`é mia casa de lasaroni, varda  che bela giornada soridente che se ga desmisià, co la l`erba  moia  che brila co`i ragii del sol’.

 - Balduino, ti ciapa el picon, la sapa e el facon, quel pesado de mànego de oss, mà stà tento parvia che gieri sera lo go gusa e adesso el taia fin i pensieri, l`é pròpio bon par copar bisse.

-Gigio, ndove gheto metesto via la ronca de taiar scapoeron, portela qua che l`é bisogno gusarla anaca quela parche no la taia gnente.

 -Faustino ti che te piase tanto ciacolar, mèteghe le sgorbe ntel mul, par dopo portar el fen del pra e, no stà mia desmentegar el faldin parchè la erba la ze ntel punto de taiarla, mia verà?

  -Carmela e Carolina, anca valtri, su del leto e, ande iutar la mama a monzer le vache e dopo a pareciar el merendin.

-Toni ti che te se grando e grosso, ciapà el Roano e el Baio e mèteghe la cangheta  che ancoi bisogna bèstie de forsa par tirar el arado.

  -Gioanin,  ti che sei el nostro bambin, ciapa i capei de dressa la zo in cantina e dopo la par l`é nove no stà mia desmentegarte de ciapar el ceston del merendin co la mama e portarlo par noantri ntela rossa.

Cossì zera sti ani de matina bonora ntela colonia, co`l movimento de persone e bèstie, zera pròpio na festa e, dopo che tuto zera d`acordo co le òrdine del pupà, se caminea contenti co`i piè descalsi verso a la rossa, cantando vècie cancione de otimismo, respirando quela àrieta pura e, sentindo el profumo inebriante dei fiori dei campi che fea i oseleti cantar la màgia de quel giorno belìssimo e,  quando se rivea ntela rossa la teneressa dela tera calmea nostre angùstie e gnanca el peso dele gambe se sentiva, cossì de tuta voia se scominsie el laoro, i tossi co la sapa e el picon e el pupà manesando l`ara, che  lo tien sicuro par far el sulco fondo,  l`é un afar che selebra la union dele bèstie che tirà el arado e co la abilità del omo che lo guida, l`é una union fraterna, parchè intanto che un sentiva ntela schena la ruspeghessa del bruto afar, quelaltro sentiva ntei bràssi el bruto sgorlon del teren e, quel  afar stufante ghe fea vegenr  ntele  so man pesade el timbro de onor, conquistà ntela insistente lota par la vita e, lera um momento in che la natura prodigiosa oferteva el suo ventre maduro par far la gestassion e, a ogni semensa che se butea zo par tera  vignea i ricordi de  nostra gente, che un giorno se gavea  assà de quel altra banda del grando oceano, quando dela partensa in risserca del sogno de guadagnar l`América.

 

Ademar Lizot.

Nenhum comentário:

Postar um comentário

Gostou?Comente aqui e se possível inscreva-se.

Topo