Mi son talian! - Ivanir Signorini

Come nei ùltimi giorni semo drio far un risgato del laoro del Giusepin, el Helio José Oro, alora ghe metemo soto el primo testo che Ivanir Signorini ga scrito per la Revista Talian Brasil...


                                                           Mi son talian!

Ritrato dela internet

Pi veci che se vien, de pi ritornemo i pensieri sora noantri e de pi gavemo cognosensa sora chi semo. Incó no me sbàlio de dir che son talian e gò orgolio d´esser.

Son nato tra due munissipi de Santa Catarina: Caxambu do Sul e Águas de Chapecó (Cassambu e Le Àque) e li gò tel mio cor.

Fiol de coloni. Me pupà, me mare e i vicini gai vegnesti de Rio Grande do Sul: Guaporé e Marau. Tuti parla intra lori in talian.

El talian stato me prima léngoa. Come disea Frete Rovilio Costa, gran defensor del Talian e che ades ze el Santo Protetor del Talian tel cielo: “La léngoa che se ciucia tee tete dea mama no se smentegha mai”. Stata la prima léngoa che gò scoltà tea vita, in tea cuna (berso).

Son saisto dea casa de me pupà par studiar. Son stato tel seminàrio, gò fato le facultae de Filosofia, dopo Teologia, el mestrà (Mestrado) tea PUC-SP. Incò son maestro (profesor) università ndove ensegno filosofia e teologia tea cità de São Paulo.

De pi che imparo, de pi gò orgolio d´esser talian, de parlar questa belìssima léngoa, la léngoa dee me radise, de mea identidà, del me cor, dea preghiera, dea vita ... la me léngoa!

Me nono no savea leder, gnanca scriver. I so fioi, un de lori me pare Santo Signorini, pouco savea leder. Mà quanto conteti che gai restai quando i so nipoti o fioi i gà scomisià studiar. La vita no gà dato questa oportunidà a lori, mà la gà dato a noantri. E noantri bisognemo capirse come continuadori dea vita de lori. Noantri semo lori, semo nostri antenati e semo la continuassion dea cultura taliana.

Me nono zera talian. Me pare anca. Lora, mi son talian ... vanti de tuto, talian. Talian brisilian, talian filòsofo, talian teòlogo, talian maestro, talian colono ... Vanti de tuto, talian! Mi son talian!


Ivanir Signorini